2019ലെ ലോകകപ്പ് സെമിയിലെ തോൽവിക്ക് ന്യൂസിലൻഡിനോട് പകരം വീട്ടാനുളള അവസരം കൂടിയായിരുന്നു ലോക ടെസ്റ്റ് ചാംപ്യൻഷിപ്പിന്റെ ഫൈനൽ. എന്നാൽ രണ്ട് ദിവസം മഴ പൂർണമായും പിന്നീട് ഭാഗികമായും തടസപ്പെടുത്തിയ മത്സരത്തിൽ ന്യൂസിലൻഡ് പേസർമാർക്ക് മുന്നിൽ കോഹ്ലിയടക്കമുളള വൻ ബാറ്റിങ് നിര തകർന്ന് അടിയുകയും ചെയ്തു. രണ്ട് ഇന്നിങ്സുകളിലും ഇന്ത്യൻ ടീമിൽ നിന്ന് ഒരാൾക്ക് പോലും അർദ്ധ സെഞ്ചുറി നേടാൻ കഴിഞ്ഞില്ല എന്നതിലുണ്ട് തകർച്ചയുടെ ആഴം. കൂടാതെ വാലറ്റവും അമ്പേ പരാജയപ്പെടുകയും ചെയ്തു. ഓസീസ് പര്യടനത്തിൽ അജിങ്ക്യെ രഹാനെയുടെ കീഴിൽ കളിച്ച് പരമ്പര നേടിയ ടീമിന്റെ മിന്നലാട്ടം പോലും ഫൈനൽ പോരാട്ടത്തിൽ ഉണ്ടായതുമില്ല.
ഇന്ത്യ അവസാനമായൊരു ഐസിസി കീരിടം ഉയർത്തിയത് എംഎസ് ധോണിയുടെ നേതൃത്വത്തില്‍ 2013 ജൂൺ 23ന് ആയിരുന്നു. എട്ട് വർഷങ്ങൾക്കിപ്പുറം മറ്റൊരു ജൂൺ 23ന് ലോക ടെസ്റ്റ് ചാംപ്യൻഷിപ്പിന്റെ ഫൈനലിൽ കോഹ്ലിയും സംഘവും കിരീടം ഉയർത്തുമെന്ന ആരാധകരുടെ പ്രതീക്ഷകൾ കൂടിയാണ് ന്യൂസിലൻഡിന്റെ മനോഹരമായ ജയത്തിൽ കൊഴിഞ്ഞത്. 2013 ജൂണ്‍ 23ന് ഇംഗ്ലണ്ടില്‍ നടന്ന ടൂര്‍ണമെന്റില്‍ ആതിഥേയ ടീമിനെ കീഴടക്കിയാണ് ധോണി നയിച്ച ഇന്ത്യ ചാംപ്യന്‍സ് ട്രോഫി സ്വന്തമാക്കിയത്. ആ നേട്ടത്തോടെ വലിയൊരു ചരിത്രവുമായിരുന്നു ധോണി കുറിച്ചത്. ടി20 ലോകകപ്പ്, ഏകദിന ലോകകപ്പ്, ചാംപ്യൻസ് ട്രോഫി എന്നിങ്ങനെ മൂന്ന് ഐസിസി കിരീടങ്ങളും നേടിയ ആദ്യ ക്യാപ്റ്റനായി ധോണി മാറിയിരുന്നു. ഈ റെക്കോഡ് ഇതുവരെ ആരും തിരുത്തിയിട്ടില്ല. ധോണിക്ക് ശേഷം കോഹ്ലിയുടെ നേതൃത്വത്തിൽ നാല് ഐസിസി ടൂർണമെന്റുകളിലാണ് ഇന്ത്യ കളിച്ചത്. ഇതിൽ ഒന്നിൽ പോലും കിരീടം നേടാൻ കഴിയാത്തതിനെ തുടർന്ന് സോഷ്യൽമീഡിയയിൽ കോഹ്ലിക്കെതിരെ വിമർശനങ്ങളും ഉയരുന്നുണ്ട്.
2014ലെ ട്വന്റി 20 ലോകകപ്പിന്റെ ഫൈനലിൽ ശ്രീലങ്കയോടായിരുന്നു ഇന്ത്യ തോറ്റത്. 2015ലെ ഏകദിന ലോകകപ്പിൽ ആതിഥേയരായ ഓസ്ട്രേലിയയോടും ഫൈനലിൽ ഇന്ത്യ തോറ്റു. 2016 ട്വന്റി 20 ലോകകപ്പിൽ സെമിയിൽ വിൻഡീസിനോടായിരുന്നു ഇന്ത്യയുടെ തോൽവി. ഇന്ത്യയെ തോൽപ്പിച്ച് ഫൈനലിൽ കടന്ന വിൻഡീസ് ഇംഗ്ലണ്ടിനെ തകർത്ത് കിരീടവും നേടി. 2017 ചാമ്പ്യന്‍സ് ട്രോഫിയിൽ കോഹ്ലിയുടെ നേതൃത്വത്തിൽ മികച്ച കളി കാഴ്ചവെച്ച് ഫൈനലിൽ കടന്ന ഇന്ത്യ പാകിസ്ഥാന് മുന്നിൽ തകർന്നടിഞ്ഞു. പാക് ടീം ഉയർത്തിയ 338 റൺസിന് മറുപടിയായി 158 റൺസ് എടുക്കാനെ ഇന്ത്യയ്ക്ക് സാധിച്ചുളളൂ.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!
