Also Read: ടിജെഎസ് ജോര്‍ജ്: ഫ്രീ പ്രസ്സിന്റെ പടി ചവിട്ടി ഒരു ഭാരതപര്യടനം| Media Roots 14
ഏഷ്യയിലെ ഏറ്റവും വലിയ പത്രപ്രവര്‍ത്തന കേന്ദ്രം അന്ന് ഹോംങ്കോങ് ആയിരുന്നു. ഏറെയൊന്നും ജനസംഖ്യയില്ലാത്ത, സ്വതന്ത്രരാജ്യം പോലുമല്ലാത്ത ഹോംങ്കോംഗില്‍ ലോകത്തെ പ്രമുഖ പത്രങ്ങളുടെയെല്ലാം പ്രതിനിധികളുണ്ടായിരുന്നു. അവിടെ ചൈനാ വാച്ചിംഗ് ആയിരുന്നു പ്രധാന ആകര്‍ഷണം. എന്നിരുന്നാലും പൊതുവെ ഒരു ഏഷ്യവാച്ചിങ് കേന്ദ്രമെന്ന നിലയിലും ഹോംങ്കേംഗ് ശ്രദ്ധിക്കപ്പെട്ടിരുന്നു. അയല്‍ രാജ്യങ്ങളില്‍ നിന്ന് വാര്‍ത്തകള്‍ അയക്കാനുള്ള വഴികളൊന്നും അക്കാലത്ത് കാര്യമായുണ്ടായിരുന്നില്ല. സര്‍ക്കാര്‍ വക ചട്ടങ്ങളും നിയമങ്ങളും അതിനു പുറമെ. എന്നാല്‍ ഹോംങ്കേംഗില്‍ ചട്ടങ്ങളള്‍ നാമമാത്രമായേ ഉണ്ടായിരുന്നുള്ളു. സ്വാന്ത്ര്യത്തോടെ അവിടെ പ്രവര്‍ത്തിക്കാന്‍ കഴിഞ്ഞിരുന്നുവെന്ന് ചുരുക്കം. അതുകൊണ്ട്, ഫിലിപ്പീന്സ് , ഇന്ത്യാനേഷ്യ, മലേഷ്യ, സിംഗപ്പുര്‍, തായ്‌ലന്റ് മുതലായ രാജ്യങ്ങളില്‍ റിപ്പോര്‍ട്ടുചെയ്യുന്ന പത്രപ്രവര്‍ത്തകര്‍ ചേക്കേറിയിരുന്നത് ഹോംങ്കേംഗിലായിരുന്നു. വിയറ്റ്‌നാം യുദ്ധകാലത്ത് ഹോംങ്കേംഗ് ആയിരുന്ന റിപ്പോര്‍ട്ടര്‍മാരുടേയും ഫോട്ടോഗ്രാഫര്‍മാരുടേയും സിരാകേന്ദ്രം.
ഇവരുടെതന്നെ മറ്റൊരു പ്രസിദ്ധീകരണം കൂടി ഉണ്ടായിരുന്നു- ഏഷ്യാ മാഗസിന്‍. ഇത് തികച്ചും വേറിട്ടൊരു പ്രസിദ്ധീകരമമായിരുന്നുവെന്ന പാറയാതിരിക്കാന്‍ കഴിയില്ല. ഇവയ്ക്ക് പുറമേ, ഫാര്‍ ഈസ്റ്റ് ട്രേഡ് പ്രസ്സ് വക പ്രസിദ്ധീകരണങ്ങളും ഈ കുട്ടത്തില്‍ പെട്ടവയായിരുന്നു. ഏഷ്യമാഗസിന്‍ എന്ന ആശയം ഏഡ്രിയന്‍ സെക്ക എന്ന പ്രതിഭാശാലിയുടേതായിരുന്നു.
ഈ സമയത്ത് ജോര്‍ജ് ഫാര്‍ ഈസ്റ്റ് ട്രേഡ് പ്രസിന്റെ മാസികകളില്‍ ഒന്നായിരുന്ന 'ഏഷ്യന്‍ ഇന്‍ഡസ്ട്രി ' യ്ക്കുവേണ്ടി ആസ്‌ട്രേലിയായിലെ ഇരുമ്പു ഖനികളെക്കുറിച്ചും ജപ്പാനിലെ ട്രാന്‍സിസ്റ്ററിനെക്കുറിച്ചും സിംഗപ്പൂരിലെ തുറമുഖ കണക്കുകളെക്കുറിച്ചുമൊക്കെയുള്ള തകര്‍പ്പന്‍ വാര്‍ത്തകള്‍ ശേഖരിച്ചും മുന്നേറുകയായിരുന്നു. പിന്നെ ഫാര്‍ ഈസ്റ്റേണ്‍ റിവ്യൂവില്‍ രാഷ്ട്രീയ ലേഖകനായി. അഭിരുചിക്കിണങ്ങിയ ജോലി ലഭിച്ചതില്‍ ഏറെ സന്തുഷ്ടനായിരുന്നു ജോര്‍ജ്.
മഹാതിര്‍ മുഹമ്മദിന്റെ കുട്ടിക്കാലം ഏറെ കഷ്ടതകള്‍ നിറഞ്ഞതായിരുന്നു. സ്‌ക്കുളില്‍ പഠിക്കുന്നകാലത്ത് അവധി ദിവസങ്ങളില്‍ ഏത്തക്കായ വറത്തുവിറ്റ് പോക്കറ്റ് മണിയുണ്ടാക്കി. നിയമം പഠിക്കുന്നതിനായി ഇംഗ്ലണ്ടില്‍ പോകണമെന്നാശിച്ചു. സാധിച്ചില്ല. സിംഗപ്പൂരിലെ മെഡിക്കല്‍ കോളേജില്‍ ചേര്‍ന്നു. രാജ്യത്തെ ആദ്യകാല ഡോക്ടര്‍മാരില്‍ ഒരാളായി. ഇങ്ങനെ നീളുന്നു മഹാതിറിന്റെ ജീവിതത്തിലെ ആദ്യ അധ്യായങ്ങള്‍.
ആതുരസേവകനെന്ന നിലയില്‍ സാധാരണക്കാര്‍ക്കിടയില്‍ പ്രവര്‍ത്തിക്കാന്‍ ലഭിച്ച അവസരങ്ങളാണ് മഹാതീറിനെ രാഷ്ട്രീയ നേതൃത്വത്തിലേക്ക് നയിച്ചതെന്ന് ജോര്‍ജ് കരുതുന്നു. അതെന്തുതന്നെ ആയാലും മലയാജനതയുടെ ശക്തനായ നേതാവായിതീര്‍ന്നു അദ്ദേഹം. അതുകൊണ്ടാണല്ലോ 2018ല്‍ തൊണ്ണൂറ്റി രണ്ടു വയസുള്ള മഹാതീര്‍ മുഹമ്മദിനെ മലേഷ്യന്‍ ജനത വീണ്ടും പ്രധാനമന്ത്രിയാക്കിയത്...!
ലീ ക്വാന്‍ യൂവിനെയും അദ്ദേഹത്തിന്റെ മനോഹര രാജ്യത്തെയും ഏഷ്യന്‍ കാഴ്ചപ്പാടില്‍ നിന്ന് പരിശോധിക്കുകയാണ് ജോര്‍ജ് ചെയ്തത്. ലിയുടെ നേട്ടങ്ങള്‍ അംഗീകരിക്കുമ്പോള്‍തന്നെ, സ്വേച്ഛാധിപത്യത്തിന്റെ പോരായ്മകള്‍ക്കെതിരെ വെളിച്ചം വീശുകയാണ് പുസ്തകത്തിലൂടെ എഴുത്തുകാരന്‍. ഭയാനകമായ പലതും അവിടെ നടന്നിരുന്നു. പ്രധാനമന്ത്രിയുടെ ഉയര്‍ച്ചയെയും ഭരണത്തെയും അദ്ദേഹം വളരെ വിശദമായി വിവരിക്കുന്നു. അദ്ദേഹത്തിന്റെ വ്യക്തിത്വം, അഭിലാഷങ്ങള്‍, രീതികള്‍ എന്നിവ വിശകലനം ചെയ്യുന്നു, വാചാടോപങ്ങളില്ലാതെ, വസ്തുതകളില്‍ നിന്ന് വാദിക്കുന്നു. അവസരവാദ മുതലാളിത്തത്തെ അനുകൂലിക്കുന്നതിനുപകരം ലീയുടെ രാഷ്ട്രീയ തത്ത്വചിന്ത ഇടതുപക്ഷമായിരുന്നുവെങ്കില്‍, പടിഞ്ഞാറ് അഭിവാദ്യം ചെയ്യുമായിരുന്നുവെന്നാണ് ജോര്‍ജ് കരുതുന്നത്. അതെന്തായാലും ലീയുടെ പ്രവര്‍ത്തനത്തെക്കുറിച്ചുള്ള ആദ്യത്തെ പൂര്‍ണ്ണമായ പഠനമാണ് ജോര്‍ജിന്റെ പസ്തകത്തിന്റെ ഉള്ളടക്കം.
പുസ്തകം പുറത്തുവന്നതോടെ ജോര്‍ജ് സിംഗപ്പൂര്‍ ഭരണകൂടത്തിന്റെ കണ്ണിലെ കരടായി മാറി. നിരന്തരമായ ഭീഷണികളുടേയും സമ്മര്‍ദ്ദങ്ങളുടേയും നടുവിലായി അദ്ദേഹത്തിന്റെ ജീവിതം. ലീ ക്വാന്‍ യൂവിന്റെ കിങ്കരന്മാര്‍ ജോര്‍ജിനെ വേട്ടയാടാന്‍ തുടങ്ങി. സിംഗപ്പൂര്‍ വഴിയുള്ള ജോര്‍ജിന്റെ യാത്ര ജോര്‍ജിന്റെ സുരക്ഷിതത്വത്തിനൊരു കനത്ത വെല്ലവിളിയായി മാറി.
വിയറ്റ്‌നാം, ലാവോസ്, കമ്പോഡിയ എന്നീ രാജ്യങ്ങള്‍ ചേര്‍ന്ന അന്നത്തെ ഇന്ത്യോ-ചൈനയില്‍ അമേരിക്ക നരമേധം നടത്തിയ നാളുകള്‍. യുദ്ധത്തിന്റെ ഭീകര മുഖം ജോര്‍ജിന് നേരിട്ട് കാണാന്‍ കഴിഞ്ഞു.
ഫാര്‍ ഈസ്റ്റേണ്‍ ഇക്കണോമിക് റിവ്യുവില്‍ പ്രവര്‍ത്തിക്കുമ്പോള്‍ പരിചയപ്പെട്ട ന്യൂസിലാന്റിലെ പ്രമുഖ പത്രപ്രവര്‍ത്തകന്‍ മൈക്കിള്‍ ഓ നീലുമായി സഹകരിച്ച് ജോര്‍ജ് ഹോങ്കോംഗില്‍ നിന്ന് സ്വന്തമായൊരു വാരിക പുറത്തിറക്കി. അതാണ് അന്താരാഷ്ട്ര പ്രസിദ്ധി നേടിയ ഏഷ്യാവീക്ക്.
(മീഡിയാ റൂട്ട്‌സ് മുന്‍ ലക്കങ്ങള്‍ ഇവിടെ വായിക്കാം)
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!