നിയമസഭയിൽ ഉദുമ എംഎൽഎ സി.എച്ച് കുഞ്ഞമ്പു ഉന്നയിച്ച സബ്മിഷന് മറുപടിയായിട്ടാണ് സാമൂഹിക നീതി വകുപ്പ് മന്ത്രി ഇങ്ങനെ മറുപടി നൽകിയത്. ദുരിതബാധിതർക്ക് സാമ്പത്തിക സഹായം അടക്കം പലതും സംസ്ഥാന സർക്കാർ ചെയ്ത് കഴിഞ്ഞു. 2010 മുതൽ ദുരിതബാധിതർക്ക് പെൻഷൻ, സൗജന്യ റേഷൻ, സൗജന്യ ചികിത്സ, പരിചാരകർക്കുളള പ്രത്യേക സഹായം, കുട്ടികൾക്കുളള വിദ്യാഭ്യാസ സഹായം, ദുരിതബാധിതരുടെ കടങ്ങൾ എഴുതി തളളൽ എന്നി കാര്യങ്ങൾ സർക്കാരുകൾ ചെയ്യുന്നുണ്ടെന്നും പെൻഷനും മുടങ്ങി കിടക്കുന്ന മറ്റ് ആനുകൂല്യങ്ങളും പുനഃസ്ഥാപിക്കണം, എൻഡോസൾഫാൻ പുനരധിവാസ സെൽ നിലച്ചു, അത് പുനസംഘടിപ്പിക്കണം എന്നുമായിരുന്നു ഉദുമ എംഎൽഎ സഭയിൽ ആവശ്യപ്പെട്ടത്.
17 ആശുപത്രികളിൽ സൗജന്യ ചികിത്സ നൽകിവരുന്നു എന്നാണ് മന്ത്രി പറയുന്നത്. എന്നാൽ എംപാനല്‍ ചെയ്ത ആശുപത്രികളില്‍ പലപ്പോഴും ചികിത്സ നിഷേധിക്കപ്പെടുന്ന സാഹചര്യങ്ങൾ രക്ഷിതാക്കൾ നേരിടേണ്ടി വരുന്നു. ഏറ്റവും അടുത്ത് 2021 ജൂലൈ 21ാം തിയതി കെഎംസി ഹോസ്പിറ്റലില്‍ ഒരു കുട്ടിക്ക് ചികിത്സ നിഷേധിച്ചു. അതിനുളള കാരണമായി രക്ഷിതാക്കളോട് അവർ പറഞ്ഞത് നിങ്ങളുടെ സര്‍ക്കാര്‍ ഇവിടെ പൈസ തരാനുണ്ടെന്നാണ്. പിന്നീട് ആ കുട്ടിയുടെ ചികിത്സയ്ക്കായി സ്വകാര്യ ആശുപത്രിയെ രക്ഷിതാക്കൾക്ക് സമീപിക്കേണ്ടി വന്നു. പലപ്പോഴും ആശുപത്രി അധികൃതര്‍ രോഗികളോടും അവരുടെ രക്ഷിതാക്കളോടും നിങ്ങളുടെ സർക്കാർ ഞങ്ങൾക്ക് തരാനുളള പണം തന്നിട്ടില്ലെന്ന് പറഞ്ഞാണ് സൗജന്യ ചികിത്സ നിഷേധിക്കുന്നത്. ഇത് വലിയ രീതിയിലുളള മാനസിക ബുദ്ധിമുട്ട് കൂടിയാണ് ഉണ്ടാക്കുന്നതെന്നും മുനീസ വ്യക്തമാക്കി. കൂടാതെ ഈ 17 ആശുപത്രികള്‍ക്ക് പുറത്ത് അവിടെ കിട്ടാത്ത ചികിത്സ ആവശ്യമായി വരുന്ന രോഗികളും ദുരിതബാധിതരിലുണ്ട്. അങ്ങനെയുളള ചികിത്സയ്ക്കായി മറ്റ് ആശുപത്രികളെ ആശ്രയിക്കേണ്ട അവസ്ഥയാണ് നിലവിൽ.
11 ആംബുലന്‍സുണ്ടെന്നാണ് സർക്കാർ പറയുന്നത്. എന്നാൽ 10 ആംബുലൻസ് മാത്രമാണുളളത്. ഒരു പഞ്ചായത്ത് ഇതുവരെ ആംബുലന്‍സ് ഏറ്റെടുത്തിട്ടേ ഇല്ല. എൻഡോസൾഫാൻ ദുരിതബാധിതർക്കായി മാറ്റിവെച്ചിരിക്കുന്ന ആംബുലൻസ് പലപ്പോഴും ലഭിക്കാത്ത സാഹചര്യമാണ് കൊവിഡ് വന്നതിൽ പിന്നെ. എപ്പോൾ വിളിച്ചാലും കൊവിഡ് ഡ്യൂട്ടിക്ക് പോയിരിക്കുകയാണ് എന്ന മറുപടിയാണ് ലഭിക്കുന്നത്. കൃത്യസമയത്ത് ആംബുലൻസ് കിട്ടാതെ ഒരു കുട്ടി ശ്വാസം ലഭിക്കാതെ മൂന്നരമണിക്കൂറോളം ബുദ്ധിമുട്ടി മരണപ്പെടുന്ന അവസ്ഥ ഉണ്ടായെന്നും ആംബുലൻസിനായി കളക്ടറെ വരെ വിളിക്കേണ്ടി വന്നെന്നുമാണ് ഇതിനെക്കുറിച്ച് മുനീസ വിശദീകരിച്ചത്.
അംബികാസുതൻ മാങ്ങാട്
മന്ത്രി നിയമസഭയിൽ പറഞ്ഞ മറ്റൊന്ന് പുനരധിവാസ ഗ്രാമമാണ്. പുനരധിവാസ ഗ്രാമം തറക്കല്ലിട്ടിട്ട് ഒരു വര്‍ഷം കഴിഞ്ഞു.. ഇപ്പോ വരും എന്ന് പറഞ്ഞ് തുടങ്ങിയിട്ട് എട്ടുവര്‍ഷമാകുന്നു. മുഖ്യമന്ത്രി ഉമ്മന്‍ചാണ്ടിയുടെ കാലത്താണ് ഇത് പ്രഖ്യാപിച്ചത്. 2020ല്‍ തറക്കല്ല് ഇട്ടിട്ടുണ്ട്. ഇനി അടുത്ത ഘട്ടം എന്നതിനെക്കുറിച്ച് അറിയിപ്പ് ലഭിച്ചിട്ടുമില്ല. ജില്ലാതലത്തിൽ കളക്ടർ അധ്യക്ഷനായുളള എൻഡോസൾഫാൻ പുനരധിവാസ സെൽ നിലച്ചിട്ട് ഒരു വർഷമാകുന്നു. പുനരധിവാസ സെല്‍ രണ്ടുമാസത്തില്‍ ഒരു തവണ ചേരണമെന്നാണ് അതിന്റെ നിയമം. പത്ത് മാസമായി ഇത് ചേര്‍ന്നിട്ടില്ല. അഞ്ച് സെല്‍ ചേരേണ്ട സമയമാണ് ഇപ്പോൾ കഴിഞ്ഞത്. എന്ന് ഇത് പുനഃസംഘടിപ്പിക്കുമെന്നും ആർക്കും അറിയില്ല.
കഴിഞ്ഞ മൂന്ന് വര്‍ഷം എൻഡോസൾഫാൻ പുനരധിവാസ സെല്ലിന്റെ കണ്‍വീനറായി ഇരുന്നത് സജിത് ബാബു എന്ന കളക്ടറാണ്. എന്‍ഡോസള്‍ഫാന്‍ വിഷമല്ലെന്നും ലിസ്റ്റിലുളളവര്‍ അനര്‍ഹരാണെന്നുമുളള പ്രതീതി സൃഷ്ടിക്കലായിരുന്നു അദ്ദേഹം ആ സ്ഥാനത്ത് ഇരുന്ന് ചെയ്തത്. ദുരിതബാധിതരെ അംഗീകരിക്കാത്ത ആളെ തന്നെ ഇതിന്റെ തലപ്പത്ത് ഇത്രയും വർഷം നിലനിർത്തിയതിൽ എന്തെങ്കിലും താത്പര്യം ഉണ്ടായിരുന്നോ എന്നത് അന്വേഷിക്കേണ്ടതാണ്. പരമാവധി ദുരിതബാധിതർക്ക് എങ്ങനെ എതിരാകാമെന്ന് മാത്രമാണ് സജിത് ബാബു നോക്കിയിരുന്നത്. ഇപ്പോൾ പുതിയ കളക്ടർ ചുമതലയേറ്റെടുത്തിരുന്നു. കാര്യങ്ങൾ പഠിക്കുന്നു എന്നാണ് അവർ പറഞ്ഞത്. ഒരു മാസം കഴിഞ്ഞെങ്കിലും ഞങ്ങൾക്ക് അനുകൂലമായ രീതിയിലുളള നടപടികൾ ജില്ലാ ഭരണകൂടം സ്വീകരിച്ചാൽ മതിയായിരുന്നു.
അംബികാസുതൻ മാങ്ങാട്, മുനീസ അമ്പലത്തറ
ദുരിതബാധിതർക്കായി സായി ട്രസ്റ്റിന്റെ നേതൃത്വത്തിലുണ്ടാക്കിയ സായിഗ്രാമത്തിലെ വീടുകളിൽ 33 എണ്ണം നിർമ്മാണം പൂർത്തിയായി വർഷങ്ങൾ പിന്നിട്ടിട്ടും ഇതുവരെ കൈമാറിയിട്ടില്ല. നാലുവർഷത്തിലേറെയായി വീടിന് അപേക്ഷ നൽകി ആളുകൾ കാത്തിരിക്കുകയാണ്. 2016-17 കാലത്ത് നിർമ്മാണം പൂർത്തിയായിട്ടാണ് ഇപ്പോഴും വീട് കൈമാറാത്തത്. ഒരുപാട് അപേക്ഷകരുണ്ടെന്നും നറുക്കിട്ട് കൊടുക്കാമെന്നുമാണ് ഇതിനെക്കുറിച്ച് അന്വേഷിച്ചപ്പോൾ മുൻ ജില്ലാ കളക്ടറായിരുന്ന സജിത് ബാബുവിന്റെ മറുപടിയെന്ന് ദുരിതബാധിതർ ഓർമ്മിക്കുന്നു. ഇതുവരെ 22 വീടുകളാണ് സായി ട്രസ്റ്റിന്റേതായി നൽകിയത്.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!
