ആറുമാസം പ്രായം, 18 കോടിയുടെ മരുന്ന് വേണം; അപൂർവ രോ​ഗവുമായി മലപ്പുറത്തെ ഇമ്രാനും

കണ്ണൂർ മാട്ടൂലിലെ ഒന്നര വയസുകാരൻ മുഹമ്മദിനെ പോലെ അപൂർവ രോ​ഗമായ സ്പൈനൽ മസ്കുലർ അട്രോഫി ബാധിച്ച മറ്റൊരു കുരുന്ന് കൂടി ചികിത്സാ സഹായം തേടുന്നു. മലപ്പുറം പെരിന്തൽമണ്ണ സ്വദേശി ആരിഫിന്റെ മകനായ ആറുമാസം പ്രായമുളള ഇമ്രാനാണ് അപൂർവ രോ​ഗം ബാധിച്ച് ചികിത്സയിൽ കഴിയുന്നത്. കോഴിക്കോട് മെഡിക്കൽ കോളെജിലെ മാതൃ-ശിശു-സംരക്ഷണ കേന്ദ്രത്തിലെ വെന്റിലേറ്ററിലാണ് വേദന കൊണ്ട് പുളഞ്ഞ് ഇമ്രാൻ കഴിയുന്നത്. 

മുഹമ്മദിനെ പോലെ ഇമ്രാന്റെയും മരുന്നിന് 18 കോടി രൂപയാണ് വേണ്ടി വരിക. രോ​ഗം സങ്കീർണമായാൽ കുഞ്ഞ് മരിക്കുന്നതിലേക്കോ, ചലന ശേഷി നഷ്ടമാകുന്നതിലേക്കോ കാര്യങ്ങൾ നീങ്ങുമെന്നാണ് ഡോക്ടർമാർ കുടുംബത്തെ അറിയിച്ചത്. മുഹമ്മദിന്റെ ചികിത്സയ്ക്കായി ലോകമെങ്ങുമുളള ജനങ്ങൾ സാമ്പത്തിക സഹായം നൽകിയത് പോലെ തന്റെ മകനും വേണ്ടി ജനങ്ങൾ ഒരുമിക്കുമെന്നാണ് ആരിഫിന്റെ പ്രതീക്ഷ. ആരിഫിന്റെ ​ഗൂ​ഗിൾ പേ നമ്പർ 8075 3935 63 എന്നതാണ്. ഈ നമ്പരിൽ വിളിച്ചാൽ ആരിഫിൽ നിന്നും നേരിട്ട് വിവരങ്ങൾ അറിയുകയും ചെയ്യാം.

ജ​നി​ത​ക വൈ​ക​ല്യ രോ​ഗ​മാ​യ സ്​​പൈ​ന​ൽ മ​സ്കു​ലാ​ർ അ​ട്രോ​ഫി​യെ​ന്ന അ​പൂ​ർ​വ രോ​ഗ​ബാ​ധി​ത​നാ​യ കണ്ണൂർ മാ​ട്ടൂ​ലി​ലെ ഒ​ന്ന​ര വ​യ​സ്സു​കാ​ര​ൻ മു​ഹ​മ്മ​ദി​നായുളള യു.എ​സ് നി​ർ​മി​ത സോ​ൾ​ജ​ൻ​സ്മ മ​രു​ന്നി​ന്​ വേ​ണ്ട 18 കോ​ടി രൂ​പ ഒരാഴ്ചയ്ക്കുളളിലാണ് കണ്ടെത്തിയത്. സമൂഹമാധ്യമങ്ങളും വാർത്താ ചാനലുകളും വിഷയം ഏറ്റെടുത്തതോടെ ലോകത്തിന്റെ വിവിധ ഭാ​ഗങ്ങളിൽ നിന്ന് സഹായം പ്രവഹിക്കുകയായിരുന്നു. പത്ത് രൂപ മുതൽ പതിനായിരം രൂപവരെയും അതിൽ കൂടുതൽ നൽകിയുമാണ് ജനങ്ങൾ മുഹമ്മദിനെ സഹായിക്കാൻ കൈകോർത്തത്.