ഞാൻ ഉറപ്പിച്ചു, എൻ്റെ പ്രാണനെപ്പോലെ സ്നേഹിച്ച എൻ്റെ സന്തത സഹചാരിയുടെ ഉള്ളിൽ നിന്നു തന്നെയാണ് ഈ ശബ്ദം. പിന്നെ ഒട്ടും താമസിച്ചില്ല സെക്കൻഡ് പ്രോഗ്രാമിന് സ്റ്റേജിലെത്തി മേക്കപ്പിടാനുള്ള അതേ ആവേശത്തിൽ സർവ്വശക്തിയുമെടുത്ത് ഞാൻ ബാഗിൻ്റെ സിബ്ബ് വലിച്ചു തുറന്നു. കരഞ്ഞ് കലങ്ങിയ കണ്ണുകളുമായി എൻ്റെ മേക്കപ്പ് ബോക്സിനുള്ളിൽ എത്രയോ വേദികളിൽ എൻ്റെ മുഖം സുന്ദരമാക്കാൻ കഷ്ടപ്പെട്ട പാൻസ്റ്റിക്കും, പാൻ കേക്കും, നെഞ്ച് പൊട്ടിത്തകർന്നു അല്പപ്രാണരായി കിടക്കുന്നു. കലൂരുളള പട്ടണം റഷീദിക്കയുടെ മേക്കപ്പ്ഷോപ്പിൽ നിന്നും രണ്ട് വർഷം മുൻപ് സ്വന്തമാക്കിയ പ്രിയപ്പെട്ട എൻ്റെ ചമയക്കൂട്ടുകാർ. ഹൃദയം നുറുങ്ങുന്ന വേദനയോടെ മേക്കപ്പ് ബോക്സ് കയ്യിലെടുത്ത് ഞാൻ നെഞ്ചോട് ചേർത്തു.
ഇക്കഴിഞ്ഞ ജൂലൈ 25ന് സമാനതകളില്ലാത്ത ഒരു സമരം ആയിരക്കണക്കിന് കലാകാരന്മാരുടെ വീടുകൾക്ക് മുന്നിൽ അരങ്ങേറി. വീട്ടുമുറ്റം അരങ്ങായും വീട്ടുകാരും ചുറ്റുവട്ടത്തുളളവരും കാണികളായും നിരന്നപ്പോൾ കൊവിഡിനെ തുടർന്ന് വേദികൾ നിലച്ച കലാകാരന്മാർ വർഷങ്ങൾക്ക് ശേഷം മുഖത്ത് ചായം തേച്ചും ഒരുങ്ങിയും വേഷങ്ങൾ അണിഞ്ഞും തങ്ങൾ അവതരിപ്പിച്ചിരുന്ന വിവിധ കലാരൂപങ്ങളുമായി രംഗത്ത് എത്തി. ചിരിയുണർത്തുന്ന രംഗങ്ങൾ അഭിനയിക്കുമ്പോഴും അരങ്ങുകളില്ലാതായ, ജീവിതം വഴിമുട്ടിയ വേദനയാണ് അവരുടെ ഉളളിൽ നിഴലിച്ചിരുന്നതെന്നാണ് ഇതിനെക്കുറിച്ച് സ്റ്റേറ്റ് ആർട്ടിസ്റ്റ് ആൻഡ് വർക്കേഴ്സ് അസോസിയേഷൻ ഓഫ് കേരളയുടെ (സവാക്) സംസ്ഥാന പ്രസിഡന്റായ അലിയാർ പുന്നപ്ര ഏഷ്യാവിൽ മലയാളത്തോട് പ്രതികരിച്ചത്. സമരഭൂമിക 2021 എന്ന പേരിട്ടാണ് കലാകാരന്മാർ വ്യത്യസ്ത വഴിയിലൂടെ തങ്ങളുടെ പ്രതിഷേധം സാമൂഹിക മാധ്യമങ്ങളിലൂടെ ലോകത്തെ അറിയിച്ചത്. നിലവിൽ പതിനായിരത്തിലേറെ അംഗങ്ങളും അവരുടെ കുടുംബങ്ങളും ചേരുന്നതാണ് സവാക് എന്ന സ്റ്റേറ്റ് ആർട്ടിസ്റ്റ് ആൻഡ് വർക്കേഴ്സ് അസോസിയേഷൻ ഓഫ് കേരള. കാസര്‍കോട്, കണ്ണൂര്‍, ആലപ്പുഴ, മലപ്പുറം, പത്തനംതിട്ട, കോഴിക്കോട്, എറണാകുളം, കോട്ടയം എന്നി ജില്ലകളിൽ കലാകാരന്മാരുടെ ഈ സംഘടന വളരെ സജീവമാണെന്നും നാല് ജില്ലകളിൽ നാമമാത്ര പ്രവർത്തനങ്ങൾ മാത്രമാണ് നടക്കുന്നതെന്നും അലിയാർ പുന്നപ്ര വ്യക്തമാക്കുന്നു.
കലാപരിപാടികള്‍ പൂര്‍ണമായി തന്നെ നിലച്ചു. ഇത് ഉപജീവനമായി സ്വീകരിച്ച ആളുകള്‍ക്ക് മറ്റ് തൊഴിലുകള്‍ ഒന്നും അറിയില്ല. നാടകവും മിമിക്‌സും ഗാനമേളയും ഒക്കെ നടത്തുമെങ്കിലും മറ്റ് ജോലികളിലേക്ക് ഇവരാരും പോയിട്ടില്ല. സര്‍ക്കാരില്‍ നിന്ന് കിട്ടുന്ന കിറ്റ് കൊണ്ടും കടം വാങ്ങിക്കൂട്ടിയും കഷ്ടിച്ചാണ് ഇവരുടെ ജീവിതം. വല്ലാത്ത പ്രതിസന്ധിയാണ് മുന്നിലുളളത്. ശരിക്കും ആത്മഹത്യാ മുനമ്പിലാണ്. ഒരാള്‍ ഒന്ന് തുടങ്ങിവെച്ചാല്‍ മതി, ബാക്കിയുളള ആള്‍ക്കാര്‍ കൂടി ആ വഴിയെ പോകുന്ന മാനസിക അവസ്ഥയിലാണ് എല്ലാവരും. സംസ്ഥാനം എമ്പാടും എടുത്താല്‍ പതിനായിരക്കണക്കിന് കലാകാരന്മാരാണ് ഇത്തരം പ്രതിസന്ധിയില്‍ പെട്ടിരിക്കുന്നത്. സംസ്ഥാന സർക്കാർ തന്നെ അംഗീകരിച്ച നാടകം, കഥാപ്രസംഗം, നൃത്തം, തുടങ്ങിയ പുതിയ കലകളും ക്ഷേത്രങ്ങളും ആയി ബന്ധപ്പെട്ട അനുഷ്ടാന കലകളും അടക്കം 37 കലാരൂപങ്ങളിലായി പതിനായിരത്തിലേറെ കലാകാരന്മാരുടെ ഉപജീവന മാർഗമാണ് കഴിഞ്ഞ രണ്ട് വർഷമായി വഴിയടഞ്ഞത്. മാനസികമായി എങ്കിലും ആ പ്രതിസന്ധി തരണം ചെയ്യണം എന്ന ഉദ്ദേശത്തോടെയും പൊതുസമൂഹത്തിനും സർക്കാരിനും മുന്നിൽ ഞങ്ങളുടെ പ്രശ്നങ്ങൾ അറിയിക്കാനുമാണ് കലാകാര സമരഭൂമിക 2021 എന്ന പരിപാടി നടത്തിയത്. ആള്‍ക്കാര്‍ കാണുമ്പോള്‍ ചിരിച്ച് പൊട്ടിപോകുമെങ്കിലും കലാകാരന്മാർ അവരുടെ ഒരു പ്രയാസത്തിന്റെ പാരമ്യത്തിലാണെന്നും അലിയാർ പറഞ്ഞു.
കലാകാര സമരഭൂമിക പരിപാടിക്കായി തന്റെ കീ ബോർഡ് എടുത്തപ്പോഴുളള കാഴ്ച കണ്ട് താൻ കരഞ്ഞുപോയെന്നാണ് മധു പുന്നപ്ര വിശദീകരിച്ചത്. ഞാന്‍ 80,000 രൂപ വിലകൊടുത്ത് വാങ്ങിയ കീ ബോര്‍ഡ്, കഴിഞ്ഞ ദിവസം ഈ സമരവുമായി ബന്ധപ്പെട്ട് മുറിയില്‍ ചെന്ന് കീ ബോര്‍ഡെല്ലാം എടുത്ത് കൊണ്ടുവന്നപ്പോള്‍ മുഴുവന്‍ ചിതല്‍ കേറി ഇരിക്കുന്നു. പെട്ടി അടച്ച് ഭദ്രമായി വെച്ചിരുന്നാലും ഇതിന്റെ അകത്ത് ചിതൽ കേറുമെന്ന് നമ്മള്‍ സ്വപ്‌നത്തില്‍ വിചാരിച്ചില്ല. കണ്ടപ്പോ കരഞ്ഞുപോയി, കാരണം ഇത്രയും വലിയ രൂപയ്ക്ക് മേടിച്ച സാധനമാണ്. അന്ന് ഞാന്‍ വിഡി രാജപ്പന്‍ സാറിന്റെ കഥാപ്രസംഗം അവതരിപ്പിക്കും. അതിനായി കീ ബോര്‍ഡ് എപ്പോഴും വാടകയ്ക്കാണ് എടുക്കുന്നത്. അന്ന് തുടര്‍ച്ചയായി സ്‌റ്റേജുകള്‍ കിട്ടുന്നത് കൊണ്ട് സ്വന്തമായി വാങ്ങുമ്പോൾ നല്ലത് ഒരെണ്ണം എടുക്കാല്ലോ എന്ന് വിചാരിച്ച് വാങ്ങിയതാണ്. അന്ന് ഇച്ചിരി പൈസ കടവും ബാക്കി കൂട്ടിവെച്ചതുമൊക്കെ ചേര്‍ത്താണ് വാങ്ങിയത്. ഇനി ഇപ്പോൾ നന്നാക്കണമെങ്കിൽ പത്ത് ആറായിരം രൂപ വേണം. ഇതുപോലെ സൗണ്ടും ലൈറ്റും എല്ലാം ഉണ്ട്. അതെല്ലാം തുരുമ്പ് എടുത്ത് കിടക്കുകയാണ്. പിന്നെ നമ്മുടെ തന്നെയല്ല, ഒത്തിരിപേരുടെ വീടുകളില്‍ ഇതെല്ലാം നശിച്ച് പോകുകയാണ്. നാടക മുതലാളിമാര്‍ എല്ലാം ലോണ്‍ എടുത്താണ് ഈ ഉപകരണങ്ങള്‍ എല്ലാം വാങ്ങുന്നത്. അപ്പോള്‍ കുറെനാള്‍ ഇരുന്ന് കഴിയുമ്പോള്‍ തുണികൊണ്ടല്ലേ സെറ്റെല്ലാം. രണ്ടാമത് ഇനി നാടകം ഇറക്കണമെങ്കില്‍ ഇവര്‍ക്ക് വലിയ തുകയാണ് വേണ്ടിവരിക എന്നും മധു വ്യക്തമാക്കി.
കേന്ദ്ര സര്‍ക്കാര്‍ ലക്ഷം കോടി രൂപയുടെ പാക്കേജ് പ്രഖ്യാപിച്ചെങ്കിലും കലാകാരന്മാര്‍ എന്ന വിഭാഗത്തിന് വേണ്ടി, ഒരു കാര്യവും നാളിത് വരെ പറഞ്ഞിട്ടില്ല. കേന്ദ്ര ഗവണ്‍മെന്റും സ്റ്റേറ്റ് ഗവണ്‍മെന്റും കലാകാരന്മാരെയും കലയെയും സംരക്ഷിക്കാനായി ഉദാരമായ ഒരു പാക്കേജ് പ്രഖ്യാപിക്കണം എന്നുളളതാണ് മറ്റൊരു പ്രധാന ആവശ്യം. കൂടാതെ കലാകാരന്മാർക്ക് സ്വയം തൊഴിൽ ചെയ്ത് ജീവിക്കാനുളള സഹായം സംസ്ഥാന സർക്കാരിന്റെ ഭാഗത്ത് നിന്ന് ഉണ്ടാകണം. ചെറിയ ബിസിനസ് അടക്കം എന്ത് തരം തൊഴില്‍ ചെയ്യുന്നതിനും സാമ്പത്തികം വേണം, അതിൽ പരിശീലനവും ഇവർക്ക് നൽകേണ്ടതായിട്ടുണ്ട്. ധനകാര്യ സ്ഥാപനങ്ങളിലൂടെ നാമമാത്രമായ പലിശയിലൂടെ അല്ലെങ്കില്‍ പലിശരഹിത വായ്പ ഇതിനായി ലഭ്യമാക്കണം. ബാങ്ക്, ഇന്‍ഡസ്ട്രീസ് ഡിപ്പാര്‍ട്ട്‌മെന്റ് എന്നിവരോടെല്ലാം സമഗ്രമായി ആലോചിച്ചാകണം ഇത് തയ്യാറാക്കേണ്ടത്.
സർക്കാരിന്റെ ബജറ്റില്‍ നാടക സമിതികള്‍ക്ക് വേണ്ടി മൂന്നുകോടി രൂപ സര്‍ക്കാര്‍ മാറ്റിവെച്ചിരുന്നു. ഇതിനെ ഞങ്ങൾ സ്വാഗതം ചെയ്യുന്നു. എന്നാൽ നാടകം മാത്രമല്ലല്ലോ കല. കഥാപ്രസംഗവും ബാലെ, മിമിക്‌സ്, നാടന്‍പാട്ട്, ഗാനമേള, യക്ഷഗാനം അടക്കമുളളവ വേറെയും ഉണ്ടല്ലോ, നാടക സമിതിക്ക് ഈ തുകയിൽ നിന്ന് ഒന്നോ, രണ്ടോ ലക്ഷം നൽകി സഹായിക്കുന്നത് പോലെ ഇത്തരം ഗ്രൂപ്പുകളെയും സർക്കാർ സഹായിക്കണം. കലയും എഴുത്തും കൂടി നിശ്ചലം ആയിപ്പോയാല്‍ ഈ സമൂഹം ദരിദ്രമായി പോകില്ലേ, ഇത് എല്ലാം ഉണ്ടായിട്ട് തന്നെ നമ്മുടെ സമൂഹത്തിന്റെ അവസ്ഥ അറിയാമല്ലോ എന്നും അലിയാർ ചോദിക്കുന്നു.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!
