'ഞാൻ കണ്ടു, ഞാനേ കണ്ടുള്ളൂ, ഞാൻ മാത്രമേ കണ്ടുള്ളൂ' ഡയ​ലോ​ഗിനു പിന്നിലെ കഥ പറഞ്ഞ് നവ്യ

നവ്യാ നായരുടെ കരിയറില്‍ നിർണായകമായ ചിത്രമാണ് നന്ദനം എന്ന ചിത്രവും അതിലെ ബാലാമണി എന്ന കഥാപാത്രവും. രഞ്ജിത്തിന്റെ സംവിധാനത്തില്‍ 2002ലാണ് സിനിമ പുറത്തിറങ്ങിയത്. നന്ദനത്തിലെ പ്രകടനത്തിലൂടെയാണ് മികച്ച നടിക്കുളള സംസ്ഥാന പുരസ്‌കാരം നവ്യയെ തേടിയെത്തിയത്.

ആ സിനിമയിലെ ഏറെ പ്രശസ്തമായ ഡയലോ​ഗാണ് ഞാൻ കണ്ടു, ഞാനേ കണ്ടുള്ളൂ, ഞാൻ മാത്രമേ കണ്ടുള്ളൂ എന്ന നവ്യയുടെ ഡയലോ​ഗ്. പിന്നീട് ആ ഡയലോ​ഗ് ട്രോളർമാരും മിമിക്രിക്കാരും ഏറ്റെടുക്കുകയും ചെയ്തു. മനോരമയ്ക്ക് നല്‍കിയ അഭിമുഖത്തിൽ നടി ആ ഡയലോ​ഗിനെക്കുറിച്ച് പറയുന്നത് ഇങ്ങനെ.

'ഭഗവാനെ കണ്ടിട്ടുള്ള ആ എക്‌സൈറ്റ്‌മെന്റില്‍ ഡയലോ​ഗ് പറയണമായിരുന്നു. ഞാന്‍ മാത്രമേ കണ്ടിട്ടുളളു. എന്ന് ആ വാക്കുകളില്‍ അതിന്റെ തീവ്രത ഉണ്ടാകണം. അങ്ങനെയാണ് ബാലാമണിയുടെ പേരില്‍ ഹിറ്റായ ആ വാചകങ്ങള്‍ പിറന്നത്. എനിക്ക് കണ്ണനോടുളള പ്രണയവും ആ വാക്കുകളിലുണ്ട്. ഇപ്പോള്‍ മിക്ക സിനിമയിലും ഈ ഡയലോഗ് പലരും പറയുന്നുണ്ട്. ട്രോളുകളിലും ഹിറ്റ്, സന്തോഷമുണ്ട്.' നവ്യ പറയുന്നു.

ഒരു ഇടവേളയ്ക്ക് ശേഷം മലയാളത്തില്‍ വീണ്ടും സജീവമാവുകയാണ് നവ്യാ നായര്‍. വികെ പ്രകാശ് സംവിധാനം ചെയ്യുന്ന ഒരുത്തീ എന്ന ചിത്രത്തിലൂടെയാണ് നടി തിരിച്ചെത്തുന്നത്.