Tok Tok: നവരസത്തിലെ പായസക്കഥ പറഞ്ഞ് രോഹിണിയും അതിഥി ബാലനും കാർത്തിക്കും

സംവിധായകനായ മണിരത്‌നം നിര്‍മ്മിക്കുന്ന ഒമ്പത് സിനിമകളുടെ സഞ്ചയമാണ് 'നവരസ'. ഒമ്പത് രസങ്ങളെ അടിസ്ഥാനമാക്കിയുളള ഒമ്പത് കഥകൾ ഒൻപത് സംവിധായകർ സിനിമയാക്കി എന്നതാണ് ഇതിന്റെ പ്രത്യേകത. ശൃംഗാരം, കരുണം, വീരം, രൗദ്രം, ഹാസ്യം, ഭയാനകം, ബീഭത്സം, അത്ഭുതം, ശാന്തം എന്നീ നവരസങ്ങളെ അടിസ്ഥാനമാക്കിയാണ് നവരസ ഒരുങ്ങിയിരിക്കുന്നത്. ​ഗൗതം മേനോൻ, അരവിന്ദ് സ്വാമി, ബിജോയ് നമ്പ്യാർ, പ്രിയദർശൻ, കാർത്തിക് നരേൻ, രതീന്ദ്രൻ പ്രസാദ്, കാർത്തിക് സുബ്ബരാജ്, വസന്ത്, സർജുൻ എന്നി സംവിധായകരാണ് ഈ ചിത്രങ്ങൾ ഒരുക്കിയിട്ടുളളത്.

സൂര്യ, വിജയ് സേതുപതി, അരവിന്ദ് സ്വാമി, പ്രകാശ് രാജ്, സിദ്ധാർത്ഥ്, പാർവതി തിരുവോത്ത്, അതിഥി ബാലൻ, പ്രയാ​ഗ മാർട്ടിൻ, രമ്യാ നമ്പീശൻ, റിത്വിക എന്നിങ്ങനെ വലിയ താരനിരയാണ് ഒമ്പത് ചിത്രങ്ങളിലായി പ്രേക്ഷകരിലേക്ക് എത്തുന്നത്. കൊവിഡ് പ്രതിസന്ധിയിലായ സിനിമാ തൊഴിലാളികളെ സഹായിക്കുന്നതിനായി ചിത്രത്തിലെ താരങ്ങളും അണിയറ പ്രവർത്തകരും പ്രതിഫലം വാങ്ങാതെയാണ് ഇതിനോട് സഹകരിച്ചത്. സിനിമയിൽ നിന്നും ലഭിക്കുന്ന വരുമാനം തമിഴ് സിനിമാ പ്രവർത്തകരുടെ സംഘടന ഫെപ്സി വഴി കൊവിഡിനെ തുടർന്ന് ദുരിതത്തിലായ സിനിമാതൊഴിലാളികൾക്ക് നൽകും.