പ്രണയവും വിരഹവുമൊക്കെ ഓര്‍മകളിലേക്കെത്തിക്കുന്ന നീര്‍മാതളവും ഗുല്‍മോഹറും ഇലഞ്ഞിയും മാത്രമല്ല വേറെയും ഒരുപാട് മരങ്ങള്‍ നട്ട് പിടിപ്പിച്ചൊരു കാട്. 20 വര്‍ഷം കൊണ്ട് മൂന്ന് ഏക്കറില്‍ 250ലേറെ വ്യത്യസ്ത ഇനം കാട്ടുമരങ്ങള്‍ കൊണ്ടൊരു കാട് സൃഷ്ടിച്ച കാവല്‍ക്കാരനെയും ഇവിടെ കാണാം. പഴയൊരു പ്രവാസിയാണ് ആ കാടിന്റെ ഉടമ. കോഴിക്കോട് കൊടുവള്ളി ആരമ്പ്രം വനശ്രീ വീട്ടില്‍ വി മുഹമ്മദ് കോയ എന്നാണ് അദ്ദേഹത്തിന്റെ പേര്. ഭാര്യയെയും കടിഞ്ഞൂല്‍ പുത്രനെയും അകന്നിരിക്കാനുള്ള സങ്കടത്തില്‍ മൂന്നു വര്‍ഷം മാത്രം പ്രായുള്ള പ്രവാസജീവിതം അവസാനിപ്പിച്ച് നാട്ടിലേക്ക് വിമാനം കയറിയയാളാണ് മുഹമ്മദ് കോയ.
1999-ലെ ജൂണ്‍ മാസത്തിലെ മഴയുള്ളൊരു ദിവസം ഏഴിലംപാല നട്ട് കൊണ്ടു തുടക്കം കുറിച്ചു. മഴക്കാലമായിരുന്നുവെങ്കിലും ചെടികള്‍ നനയ്ക്കാന്‍ ബുദ്ധിമുട്ടിയിരുന്നുവെന്നു മുഹമ്മദ് കോയ പറയുന്നു. 'കിണര്‍ പോലും ഈ പറമ്പില്‍ ഇല്ലായിരുന്നു. മഴക്കാലം മാറിയതോടെ ജലക്ഷാമമവും വന്നു. കാട് എന്ന സ്വപ്നം മറക്കുക അല്ലെങ്കില്‍ തൈകള്‍ നനയ്ക്കാന്‍ എങ്ങനെയും വഴി കണ്ടെത്തുക.. ഇതല്ലാതെ വേറൊന്നും മനസില്‍ ഇല്ലായിരുന്നു. വൃക്ഷത്തണലൊന്നും ഇല്ലാത്ത ഈ മണ്ണില്‍ എന്റെ ബൈക്ക് വെയിലേല്‍ക്കാതെ വയ്ക്കാനുള്ള ഇടം പോലും ഇല്ലായിരുന്നു. പക്ഷേ കാട് എന്ന സ്വപ്നം സഫലമാക്കുക മാത്രമായിരുന്നു ലക്ഷ്യം. അതിനു വേണ്ടി കഷ്ടപ്പെടാനും ഒരുക്കമായിരുന്നു. സമീപത്ത് സഹോദരന്റെ വീടുണ്ട്. കുന്നിന് മുകളിലേക്ക് കയറുന്നതു പോലെ നടന്നു വേണം ഈ പറമ്പിലേക്കെത്താന്‍. താഴെയാണ് സഹോദരന്റെ വീടും.
'ജലക്ഷാമം മാത്രമല്ല പരിഹരിക്കപ്പെട്ടത്. കാറ്റിലൂടെയും പക്ഷികളിലൂടെയും വൃക്ഷങ്ങളുടെ വിത്തുകള്‍ പലയിടത്തും എത്തി. ഈ കാടിന് സമീപമുള്ള വീടുകളിലും പറമ്പുകളിലുമൊക്കെ വനവൃക്ഷങ്ങള്‍ മുളച്ചു വന്നിട്ടുണ്ട്. ചെടികളും തൈകളുമൊക്കെ നട്ടുപിടിപ്പിച്ചാല്‍ മാത്രം മതിയല്ലോ.. ബാക്കിയെല്ലാം പ്രകൃതി ഏറ്റെടുക്കും. ഇതു പോലൊരു കാടുണ്ടാക്കണമെന്ന ആഗ്രഹം പലരും പങ്കുവച്ചിട്ടുണ്ട്. അവരോടൊക്കെ ഒറ്റ ദിവസം കൊണ്ട് കാട് നിര്‍മിക്കാനാകില്ലെന്നാണ് പറഞ്ഞത്. എന്നാല്‍ അങ്ങനെയൊരു ആഗ്രഹം ശക്തമായി മനസിലുണ്ടെങ്കില്‍ നടക്കും. സ്വന്തമായി ഭൂമി വേണമെന്നുമില്ല.' ഏതു പറമ്പിലും കാടുണ്ടാക്കാമെന്നാണ് മുഹമ്മദ് കോയ പറയുന്നത്.
സന്ദര്‍ശകര്‍ക്കായി ഓരോ വൃക്ഷത്തിന്റെയും പേര്, ശാസ്ത്രീയനാമം, ഗുണങ്ങള്‍ ഇതൊക്കെ ബോര്‍ഡില്‍ എഴുതി മരത്തില്‍ തൂക്കിയിട്ടിട്ടുണ്ട്. ഇതിനൊപ്പം മരത്തെക്കുറിച്ച് കഥയിലോ കവിതയിലോ പറഞ്ഞിട്ടുണ്ടെങ്കില്‍ അക്കാര്യവും കുറിച്ചിട്ടുണ്ട്. അങ്ങനെ സാഹിത്യങ്ങളിലെ മരങ്ങളെയും സസ്യങ്ങളെയുമൊക്കെ മുഹമ്മദ് പരിചയപ്പെടുത്തുകയാണ്. അതുകൊണ്ടു തന്നെ ഈ വനം ബൊട്ടാനിക്കല്‍ ഗാര്‍ഡന്‍ മാത്രമല്ല ലിറ്ററസി ഗാര്‍ഡന്‍ കൂടിയാണ്. മാധവിക്കുട്ടിയുടെ നീര്‍മാതളം, വൈക്കം മുഹമ്മദ് ബഷീറിന്റെ മാങ്കോസ്റ്റിന്‍, മലയാറ്റൂര്‍ രാമകൃഷ്ണന്റെ ഏഴിലംപാല, കുമാരനാശാന്റെ കവിതകളിലെ വാകയും ഇലഞ്ഞിയും രാജമല്ലിയും രാമായണത്തിലെ ശിംശിപയുമൊക്കെ ഈ കാട്ടിലുണ്ട്. പുസ്തകങ്ങളോടുള്ള കമ്പം കൊണ്ടാണ് ഇങ്ങനെ ചെയ്തതെന്നു മുഹമ്മദ് കോയ കൂട്ടിച്ചേര്‍ത്തു.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!
