Also Read: ഉണ്ണീരിക്കുട്ടി തിരികൊളുത്തിയ വിപ്ലവം!| Media Roots 31
ഇങ്ങനെയിരിക്കെയാണ് 1970 ഫെബ്രുവരി 18ാം തിയതി നക്സല് നേതാവ് വര്‍ഗീസിനെ പിടികൂടുന്നത്. മാനന്തവാടി പോലീസ് സ്റ്റേഷനിലേക്ക് കൊണ്ടുപോകാന്‍ തീരുമാനിച്ചെങ്കിലും ഉന്നത പോലീസ് ഉദ്യോഗസ്ഥരുടെ നിര്‍ദേശപ്രകാരം തിരുനെല്ലിയിലേക്കു തന്നെ തിരികെ കൊണ്ടു പോകുകയായിരുന്നു. തിരുനെല്ലിയില്‍ നിന്ന് വര്‍ഗീസിനെ വനത്തിലേക്ക് കൂട്ടിക്കൊണ്ടുപോകാന്‍ നാലു കോണ്‍സ്റ്റബിള്‍മാരെ നിയോഗിച്ചു. ഈ വിവരം തായാട്ടുശങ്കരന്റെ ചെവിയിലുമെത്തിയിരുന്നു. പിന്നീട് കേട്ടത് വര്‍ഗീസ് കൊല്ലപ്പെട്ടു എന്നാണ്. ഏറ്റുമുട്ടലിലാണ് കൊല്ലപ്പെട്ടതെന്ന് പോലീസ് പ്രചരിപ്പിക്കുകയും ചെയ്തു.
തോമസ് ജേക്കബ്ബ് പറഞ്ഞതിലെ പിശക് ഒരു വായനക്കാരന്‍ തന്നെ അടുത്തലക്കം ആഴ്ചപ്പതിപ്പില്‍ ചൂണ്ടിക്കാട്ടിയിരുന്നു. ദേശാഭിമാനി ലേഖകനും പിന്നീട് പബ്ളിക്ക് റിലേഷന്‍സ് വകുപ്പ് ഉദ്യോഗസ്ഥനുമായിരുന്ന എ. വി ആലിക്കോയ തുടര്‍ന്നുവന്ന മാതൃഭൂമി ആഴ്ച്ചപതിപ്പില്‍ ഇക്കാര്യം പറയുന്നതിങ്ങനെ:
'നക്സല് നേതാവ് വര്‍ഗ്ഗീസ് കൊല്ലപ്പെട്ട സംഭവം ഓര്‍മിക്കുമ്പോള്‍ ഏറ്റുമുട്ടല്‍ മരണം എന്ന പൊലീസ് കഥ അപ്പാടെ വിഴുങ്ങുകയായിരുന്നു പത്രലോകം എന്ന് തോമസ് ജേക്കബ് പറയുന്നു. ഈ പ്രസ്താവം ശരിയല്ല. ആ ക്രൂരസത്യം അപ്പോള്‍ തന്നെ ജനങ്ങളെ അറിയിച്ച പത്രമായിരുന്നു ദേശാഭിമാനി എന്ന് ചൂണ്ടിക്കാണിച്ചുകൊള്ളട്ടെ. വര്‍ഗ്ഗീസിനെ പൊലീസ് വെടിവെച്ചുകൊന്നു എന്ന തലക്കെട്ടോടെയാണ് ദേശാഭിമാനി ഒന്നാം പേജില്‍ ആ വാര്‍ത്ത പ്രസിദ്ധീകരിച്ചത്. അന്ന് ദേശാഭിമാനിയുടെ കണ്ണൂര്‍ ലേഖകനായിരുന്ന പട്ടുവം രാഘവന്റെ പേര് വെച്ചാണ് ദേശാഭിമാനി ആ വാര്‍ത്ത പ്രസിദ്ധീകരിച്ചത്. വസ്തുതകള്‍ കൂടുതല്‍ വിശദമാക്കിക്കൊണ്ടും ഈ നെറികേടിനെ ചോദ്യം ചെയ്തുകൊണ്ടും സി പി അച്യുതന്‍ തയ്യാറാക്കിയ മുഖ്യലേഖനം അടുത്ത ആഴ്ചയില്‍ ചിന്ത പ്രസിദ്ധീകരിക്കുകയുണ്ടായി. കാലങ്ങള്‍ കഴിഞ്ഞാണ് ഒരു പൊലീസുകാരന്‍ സത്യാവസ്ഥയുമായി രംഗത്തുവരുന്നത്.''
എന്നാല്‍ തോമസ് ജേക്കബ് മാത്രനല്ല ആലിക്കോയയും മനപൂര്‍വമോ അല്ലാതെയോ വിട്ടുകളഞ്ഞ മറ്റൊരു സത്യം കൂടി ഉണ്ട്. വിപ്ലവം പത്രത്തില്‍ തായാട്ടു ശങ്കരന് വയനാട്ടിലെ നക്സല് നേതാവ് വര്‍ഗീസിനെ വെടിവെച്ചു കൊന്നെന്നും കണ്ണുകള്‍ ചൂഴ്ന്നെടുത്തിരുന്നുവെന്നും മറ്റും ശക്തമായ ഭാഷയില്‍ 'നിയന്ത്രണംവേണം' എന്ന തലക്കെട്ടില്‍ എഡിറ്റോറിയല്‍ എഴുതിയിരുന്നു. ഉണ്ണീരിക്കുട്ടി രാവിലെ തന്നെ ഈ എഡിറ്റോറിയലിനെ അഭിനന്ദിക്കുകകൂടി ചെയ്തിരുന്നുവത്രെ..!
അതോടെ തായാട്ടുശങ്കരനും വാശിയിലായി. തനിക്കു പണമുണ്ട്. എനിക്ക് വിവരമുണ്ട് ഇതുരണ്ടും ഒരുമിച്ചുപോകുകയില്ല എന്ന് പ്രഖ്യാപിച്ചുകൊണ്ട് ഇറങ്ങിപ്പോയി. അങ്ങനെ അല്പകാലത്തെ പത്രാധിപത്യത്തിനു ശേഷം അദ്ദേഹം പഴയ ലാവണത്തിലേക്ക് തന്നെ മടങ്ങി.
പിന്നീട് വിപ്ലവത്തിന്റെ മുഖ്യപത്രാധിപരായി വന്നത് പി. പി ഉമ്മര്‍ കോയ ആയിരുന്നു.
പി. എ മുഹമ്മദ് കോയ എന്ന മുഷ്താഖും മുല്ലപ്പള്ളി രാമചന്ദ്രനുമായിരുന്നു അതുവരെ എഡിറ്റോറിയല്‍ ഡെസ്‌ക്കിലെ ദൈനംദിനകാര്യങ്ങള്‍ നിയന്ത്രിച്ചുകൊണ്ടിരുന്നത്. തെറമ്മല്‍ കൃഷ്ണന്‍ വഴിയാണ് മുല്ലപ്പള്ളി രമചന്ദ്രന്‍ വിപ്ലവത്തിലേക്ക് വരുന്നത്. കൃഷ്ണന്റെ ഉറ്റ സുഹൃത്തായ മുല്ലപ്പള്ളി ഗോപാലന്‍ എന്ന സ്വതന്ത്യ സമരസേനാനിയുടെ മകനാണ് മുല്ലപ്പള്ളി രാമചന്ദ്രന്‍. വടകര-ചോമ്പാല പ്രദേശത്തെ മാതൃഭൂമിയുടെ സ്വന്തം ലേഖകന്‍ കൂടിയാണ് ഗോപാലന്‍. പലപ്പോഴും റിപ്പോര്‍ട്ടുകള്‍ എടുക്കാന്‍ അയക്കുന്നത് രാമചന്ദ്രനെയാണ്. അന്നുമുതലെ പത്രപ്രവര്‍ത്തനത്തില്‍ ഏറെ തല്പരനായിരുന്നു മുല്ലപ്പള്ളി രാമചന്ദ്രന്‍. 'വിപ്ലവ'ത്തില്‍ ചേരുമ്പോള്‍ തന്നെ കക്ഷി ഒരു നിബന്ധന വച്ചിരുന്നു. രാത്രി സ്ഥിരമായി പത്രമോഫീസിലുണ്ടാകും. പിന്നെ ശനി, ഞായര്‍ ദിവസങ്ങളില്‍ ഫുള്‍ടൈം കാണും. അത് ഉണ്ണീരിക്കുട്ടി അംഗീകരിക്കുകയും ചെയ്തു. ശോഭീന്ദ്രനും എബ്രഹാം മാനുവലും മിക്കവാറും രാത്രികളില്‍ മുല്ലപ്പള്ളിയോടൊപ്പം കാണും. ചിലപ്പോഴൊക്കെ ബാബുരാജും കൂടും. ആ നാളുകളാണ് ജീവിതത്തിലെ ഏറ്റവും മനോഹരമായ ദിനങ്ങളെന്ന് മുല്ലപ്പള്ളിയും ശോഭിന്ദ്രനും ബാബുരാജും ഒരേ സ്വരത്തില്‍ പറയുന്നു.
രാഷ്ട്രീയ തത്ത്വശാസ്ത്രത്തില്‍ ഡോക്ടറേറ്റ് നേടിയ രാം മനോഹര്‍ ലോഹ്യയുടെ വലിയ ആരാധകനായിരുന്നു എബ്രഹാം മാനുവല്‍. സോഷ്യലിസ്റ്റായ ലോഹ്യ എഴുതിയ പുസ്തകങ്ങള്‍ ആരേയും ആവേശം കൊള്ളിക്കുന്നതാണ്. ആ പുസ്തകങ്ങളൊക്കെ വായിച്ചുപഠിച്ചിരുന്നു എബ്രഹാം മാനുവല്‍. പ്രസംഗമാണ് കക്ഷിയുടെ ഇഷ്ട വിഷയം. പത്രമോഫീസിലെ പണികളെല്ലാം കഴിഞ്ഞാല്‍ എബ്രഹാം മാനുവല്‍ പ്രസംഗത്തിന്റെ റിഹേഴ്സല്‍ തുടങ്ങുകയായി. എഡിറ്റോറിയല്‍ ഡെസ്‌ക്കിന്റെ മുകളില്‍ കയറിനിന്ന് ശബ്ദമുയര്‍ത്തിയുള്ള പ്രസംഗം. ശ്രോതാക്കളായി മുല്ലപ്പള്ളിയും ശോഭിന്ദ്രനും. ഇടക്ക് ചില വിഷയങ്ങളില്‍ കൊണ്ടുപിടിച്ച തര്‍ക്കമുണ്ടാകും. ശോഭിന്ദ്രന്റെ ചില രസകരമായ കമന്റുകള്‍ വരുന്നതോടെ അതൊരു കൂട്ടച്ചിരിയില്‍ കലാശിക്കും. പിന്നെ സംഘം ചേര്‍ന്ന് പാതിരാത്രിക്ക് നടന്നുപോയുള്ള കട്ടന്‍ചായ കുടി.
അക്കാലത്ത് മുല്ലപ്പള്ളിയുടെ സ്നേഹവും കരുതലും സംരക്ഷണവും തനിക്ക് ഒരു മുതിര്‍ന്ന സഹോദരനില്‍ നിന്നെന്നപോലെ ആയിരുന്നെന്ന് ശോഭിന്ദ്രന്‍ പറയുന്നു. കോഴിക്കോട് പാരഗണിനടുത്ത് ഒരു കുടുസുമുറി മുല്ലപ്പള്ളി വാടകയ്ക്ക് എടുത്തിട്ടുണ്ടായിരുന്നെങ്കിലും പത്രമോഫീസില്‍ ന്യൂസ് പ്രിന്റ് വിരിച്ച് എല്ലാവരുംകൂടി ഒന്നിച്ചുള്ള ഉറക്കം മറക്കാന്‍ കഴിയില്ല എന്നാണ് മുല്ലപ്പള്ളി പറയുന്നത്.
ഇതിനിടെ എറണാകുളത്തുനിന്ന് മറ്റൊരാള്‍ കൂടി വിപ്ലവത്തില്‍ എത്തി. പി. ഐ ശങ്കരനാരാണന്‍. ജോണ്‍ മാമ്പിള്ളിയുടെ 'മലബാര്‍ ഹെറാള്‍ഡ്' എന്ന ഇംഗ്ലീഷ് വീക്കിലിയില്‍ പ്രവൃത്തിച്ചുകൊണ്ടിരിക്കുമ്പോഴാണ് പെരുന്ന കെ. എന്‍ നായര്‍ വിപ്ലവം പത്രത്തിലൊരു ഒഴിവുണ്ടെന്നുപറയുന്നത്. അങ്ങിനെയാണ് ശങ്കരനാരായണന്‍ വിപ്ലവത്തിലെത്തുന്നത്. ആദ്യദിവസങ്ങളില്‍ രാത്രി തങ്ങിയിരുന്നത് മുല്ലപ്പള്ളി രാമചന്ദ്രനോടൊപ്പം കോഴിക്കോട്ടങ്ങാടിയിലെ ഉണ്ണീരിക്കുട്ടിയുടെ കൊപ്രക്കളത്തിന്റെ മച്ചിന്‍ മുകളിലായിരുന്നു. ഒന്നുറങ്ങിവരുമ്പോഴേക്കും കാലില്‍ എലി കരണ്ടിരിക്കും. അങ്ങിനെഎലിക്കൂട്ടങ്ങളോട് മല്ലടിച്ച് അല്പദിവസം കഴിച്ചുകൂട്ടിയത് ഒരിക്കലുംമറക്കാനാകില്ലെന്നാണ് ശങ്കരനാരായണനും മുല്ലപ്പള്ളിയും പറയുന്നത്. പിന്നെ ശങ്കരനായണന്‍ മാവൂര്‍ റോഡിനടുത്തുള്ള പ്രിന്‍സ് ഹോസ്റ്റലിലേക്ക് മാറി.
വിപ്ലവത്തിന്റെ വാരാന്തപ്പതിപ്പിലാണ് ശങ്കരനാരായണന്‍ കൂടുതല്‍ ശ്രദ്ധ കൊടുത്തത്. കുമാരനാശാന്റെ 'കരുണയിലെ ചില അപാകതകള്‍' എന്നൊരു ലേഖനപരമ്പര തുടങ്ങിയിരുന്നു. ഏറെയൊന്നും സംസാരിക്കാത്ത ഫോട്ടോഗ്രാഫര്‍ ബാലന്റെ മനോഹരമായ ഫോട്ടോ, കാര്‍ട്ടൂണിസ്റ്റ് ബി. എം ഗഫൂറിന്റെ കാര്‍ട്ടൂണ്‍ സ്‌ക്കെച്ചുകള്‍(ആദ്യ പേജില്‍ ഇടയ്ക്കൊക്കെ രാഷ്ട്രീയ കാര്‍ട്ടൂണുകളും വരച്ചിരുന്നു) വാരാന്ത്യപ്പതിപ്പിന് ശോഭകൂട്ടുന്ന വിഭവങ്ങളായിരന്നു അവയെല്ലാണെന്ന് ശങ്കരനാരായണന്‍ ഓര്‍ക്കുന്നു.
രത്‌നാസിംഗ്, ബാബുരാജ്, പി. എ കൃഷ്ണന്‍ കുട്ടി, രാമചന്ദ്രന്‍ തുടങ്ങിയവരായിരുന്നു റിപ്പോര്‍ട്ടര്‍മാര്‍. ആദ്യപേജില്‍ പോക്കറ്റ് കാര്‍ട്ടൂണുമുണ്ടായിരുന്നു. കോടിയേരിക്കാരന്‍ പി. ഗംഗാധരനായിരുന്നു വരച്ചിരുന്നത്. അക്കാലത്ത് പ്രസിദ്ധീകരണങ്ങളില്‍ കഥകളും ലേഖനങ്ങളും ധാരാളമായി എഴുതിക്കൂട്ടിയിരുന്ന കുട്ടികൃഷണന്‍ നാരായണനഗരമാണ് പ്രധാന പ്രൂഫ് റീഡര്‍.
വിപ്ലവത്തില്‍ പ്രവര്‍ത്തിച്ചിരുന്ന പത്രപ്രവര്‍ത്തകര്‍ക്ക് ഒരു സംഘടനയും അന്നുണ്ടായിരുന്നു- വിപ്ലവം എഡിറ്റോറിയല്‍ സ്റ്റാഫ് അസോസിയേഷന്‍. അതിന് പ്രത്യേക ഭരണഘടനയുമൊക്കെ അച്ചടിച്ചിരുന്നു.
പുതിയ വാര്‍ത്തകള്‍ക്കുവേണ്ടിയുള്ള നിതാന്ത ജാഗ്രത കോണ്ടുമാത്രമാണ് ഈജിപ്തിന്റെ രണ്ടാമത്തെ പ്രസിഡന്റായിരുന്നു ഗമാല്‍ അബ്ദുന്നാസറിന്റെ വൈകിവന്ന മരണം വിപ്ലവത്തിന്റെ ഒടുവിലത്തെ എഡിഷനില്‍ ചേര്‍ക്കാനായതെന്നും മുല്ലപ്പള്ളി ഓര്‍മിക്കുന്നു. മറ്റൊരു മലയാളപത്രത്തിലും ആ വാര്‍ത്ത അന്ന് വന്നില്ല. 1970ല്‍ അറബ് ലീഗ് സമ്മിറ്റിനെത്തുടര്‍ന്ന് അദ്ദേഹം ഹൃദയാഘാതം മൂലം 52ാം വയസ്സില്‍ മരിക്കുന്നു. ഇരുപതാം നൂറ്റാണ്ടിലെ തിളങ്ങുന്ന രാഷ്ട്രീയ വ്യക്തിത്വത്തിന്റെ ചരമവാര്‍ത്ത ചൂടാറും മുമ്പ് കൊടുക്കാനായതോടെ 'വിപ്ലവ'സംഘത്തിന് എന്തെന്നില്ലാത്ത അഭിനിവേശമായി..!
500-ലധികം പത്രങ്ങളില്‍ ഒരു സിന്‍ഡിക്കേറ്റഡ് കോളമായി രാജ്യവ്യാപകമായി പ്രസിദ്ധീകരിച്ചിരുന്ന ആ കോളം അക്കാലത്ത് ടൈംസ് ഓഫ് ഇന്ത്യയിലും ഉണ്ടായിരുന്നു. വിപ്ലവത്തിലെ ആ വര്‍ത്തകളെക്കുറിച്ച് തോമസ് ജേക്കബ് മനോരമ ആഴ്ചപ്പതിപ്പിലെ കഥക്കൂട്ടില്‍ ഒന്നല്ല, രണ്ടുവട്ടും എരുവും പുളിയും ചേരുംപടി ചേര്‍ത്ത് എഴുതിയിരുന്നു.
ഒരുദിവസം വൈകീട്ട് ഉണ്ണീരിക്കുട്ടി വീട്ടില്‍ ചായ കുടിച്ചുകൊണ്ടിരിക്കുകയായിരുന്നു. അപ്പോള്‍ പ്രസ്സില്‍നിന്ന് മാനേജര്‍ ഫോണില്‍ വിളിച്ചുപറഞ്ഞു: 'മുതലാളി ഇങ്ങോട്ട് വരരുത്, ആകെ കുഴപ്പമാണ്.'
'എന്റെ സ്ഥാപനത്തില്‍ വരരുതെന്നുപറയാന്‍ ആര്‍ക്ക് എന്തവകാശം..? '
ചാടിഎഴുന്നേറ്റ് ആയിടെ കോയമ്പത്തൂരില്‍ നിന്നും വാങ്ങിയ ബെന്‍സുകാറില്‍ പ്രസ്സിലേക്ക് പാഞ്ഞുപോയി. ഉണ്ണീരിക്കുട്ടി അവിടെ എത്തിയതോടെ മുദ്രവാക്യം വിളിയുടെ ശക്തി ഏറി. പിന്തിരിപ്പന്‍ മുതലാളി..ഇക്കളി തീക്കളി.. സുക്ഷിച്ചോ..!
ഉടന്‍തന്നെ കാറിനുമുന്നില്‍ മുല്ലപ്പള്ളിയും സംഘവും ചാടിവീണു. പിന്നെ കാറിനുകുറുകെ റോഡില്‍ കിടന്നു. കാറില്‍ നിന്നിറങ്ങി ക്ഷുഭിതനായി ഉണ്ണീരിക്കുട്ടി ചോദിച്ചു: ആരോടാണ് നിങ്ങളിങ്ങനെ സംസാരിക്കുന്നതെന്നറിയാമോ..?
നന്നായി അറിയാം... എം. എ ഉണ്ണീരിക്കുട്ടിയോട് തന്നെ..! മുല്ലപ്പള്ളിയാണത് പറഞ്ഞത്.
'പണമെനനിക്കൊരു പ്രശ്നമല്ല. നിങ്ങള്‍ പിന്മാറിയില്ലെങ്കില്‍ പത്രം ഞാന്‍ അടച്ചുപൂട്ടും. '
'ശമ്പളം വര്‍ദ്ധിപ്പിക്കാതെ സമരത്തില്‍ നിന്ന് പിന്മാറുന്ന പ്രശ്നമില്ല..!'
ജീവനക്കാര്‍ക്കും വാശിയേറി. അവര്‍ ഉണ്ണീരിക്കുട്ടിയെ ഘേരാവോ ചെയ്തു. ഇതിനിടെ ഭാര്യ പാഞ്ചാലി സുഹൃത്തുക്കളോടും ബന്ധുക്കളോടും സംഗതി വിളിച്ചുപറഞ്ഞു. അവവര്‍ നേരിട്ട് ചെന്നുകാണുകയും ചെയ്തു. ഒട്ടേറെ ആളുകള്‍ തടിച്ചുകൂടി. വിട്ടുവീഴ്ചക്ക് ആരും തയ്യാറായില്ല. അന്ന് പത്രം ഇറങ്ങില്ലെന്ന് ഉറപ്പാക്കിയ ശേഷം രാത്രി ഒരുമണിയോടെ ഘേരാവോ അവസാനിപ്പിച്ചു. അതിനുശേഷം ഒട്ടും മടിക്കാതെ ഉണ്ണീരിക്കുട്ടി പത്രം ഓഫിസ് അടച്ചുപൂട്ടി. വിപ്ലവത്തില്‍ ജോലി ചെയ്തിരുന്നവര്‍ക്ക് കോമ്പന്‍സേഷന്‍ കൊടുത്ത് പിരിച്ചുവിട്ടു.
എന്തുതന്നെ ആയാലും പിപ്ലവം എന്ന പത്രം ഉണ്ണീരിക്കുട്ടിയുടെ ജീവിതത്തില്‍ വലിയൊരു വഴിത്തിരിവുതന്നെയായിരുന്നു. അതോടുകൂടിയാണ് കോഴിക്കോട്ടെ സാമൂഹ്യ സേവനരംഗത്ത് അദ്ദേഹം ശ്രദ്ധേയനായിത്തീര്‍ന്നത്. വ്യാപാരികളുടേയും വ്യവസായികളുടേയും സംഘടനയായ മലബാര്‍ ചേമ്പര്‍ ഓഫ് കോമേഴിസിനെ ജനങ്ങളുടെ ഇടയിലേക്ക് ഇറക്കിക്കൊണ്ടുവന്നത് ഉണ്ണീരിക്കുട്ടി അതിന്റെ സാരഥ്യം വഹിച്ചപ്പോഴായിരുന്നു. എസ്. എന്‍ ട്രെസ്റ്റ് ചെയര്‍മാനായിരിക്കെ അധ്യാപകനിയമനത്തിന് ഡയറക്ടര്‍മാര്‍ കോഴവാങ്ങിയതിനെ ശക്തമായി എതിര്‍ത്ത് രാജിവച്ചവനാണ് ഉണ്ണീരിക്കുട്ടി.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!
