വ്യാപാരി-വ്യവസായികളുടെ ഭാരവാഹിയായിരുന്ന ഉണ്ണീരിക്കുട്ടിയുടെ ചില പ്രസ്താവനകള്‍ മാതൃഭൂമി പത്രത്തിന് കൊടുത്തു. അവരത് ചവറ്റുകുട്ടയിലെറിഞ്ഞു എന്ന് അറിഞ്ഞപ്പോള്‍ ഉണ്ടായ രോഷം, വാശി..! എന്നാല്‍പ്പിന്നെ ഇതോക്കെ അച്ചടിക്കാന്‍ ഒരു പത്രം തുടങ്ങുകതന്നെ. പല പേരുകള്‍ ആലോചിച്ചു. അടുത്ത സുഹൃത്ത് തെരുവത്ത് രാമന്‍ ഉള്‍പ്പടെ പലരോടും പത്രത്തിനു പറ്റിയ പേര് നിര്‍ദ്ദേശിക്കാന്‍ പറഞ്ഞു. അപ്പോഴും അദ്ദേഹത്തിന്റെ മനസ്സില്‍ ഒരു പേരുണ്ടായിരുന്നു. ആരെങ്കിലും ആ പേര് പറയുമോ എന്നറിയാനുള്ള ഒരു പരീക്ഷണം കൂടിയായിരുന്നു പേരു ചോദിക്കല്‍.
ഇതിനിടെ കോഴിക്കോട് ഇംഗ്ലീഷ് പള്ളിക്കുസമീപം വയനാട് റോഡില്‍ കെട്ടിടം പണി തുടങ്ങി. 1966ല്‍ മനോരമയുടെ കോഴിക്കോട് എഡിഷന്‍ തുടങ്ങിയത് വിപ്ലവം പത്രം ഓഫീസ് പണിയുന്നതിന് ഏതാണ്ട് എതിര്‍വശത്തായിരുന്നു.
അപ്പോഴേക്കും തറമ്മല്‍ കൃഷ്ണന്‍ ഉണ്ണീരക്കുട്ടിയുമായുള്ള അഭിപ്രായ വ്യത്യാസത്തിലായി. 'നിങ്ങള്‍ കൊപ്രയുടെ കാര്യം നോക്കുന്നതുപോലെയല്ല പത്രത്തിന്റെ കാര്യം...പത്രത്തിന് ചില ധര്‍മ്മങ്ങളുണ്ട്.' തുടര്‍ന്നുണ്ടായ നീരസത്താല്‍ വിപ്ലവത്തോട് സലാം പറഞ്ഞിരുന്നു. അങ്ങനെ പത്രം പുറത്തിറങ്ങും മുമ്പ് പുറത്താക്കപ്പെട്ട പത്രാധിപര്‍ എന്ന റെക്കാര്‍ഡിനുടമയായി തറമ്മല്‍ കൃഷ്ണന്‍.
ഇനി വിപ്ലവത്തിന്റെ പത്രാധിപര്‍ ആരായിരിക്കണം എന്നതിനെക്കുറിച്ച് തെരുവത്തു രാമന്‍ തലപുകഞ്ഞാലോചിച്ചു. പല പേരുകളും തെളിഞ്ഞുവന്നു. ഉണ്ണീരിക്കുട്ടിയുമായി ഒത്തു പോകുന്ന വിപ്ലവചിന്താഗതിക്കാരന്‍ വേണമല്ലോ..! ഇതിനിടയ്ക്ക് ഉണ്ണീരിക്കുട്ടിയുടെ ഫോണ്‍ പലപ്പോഴായി വന്നുകൊണ്ടിരുന്നു. ഒടുവില്‍ അങ്ങനെയൊരാളെ രാമന്‍ കണ്ടേത്തി. തവന്നൂര്‍ റൂറല്‍ ഇന്‍സ്റ്റിറ്റൂട്ടില്‍ അധ്യാപകനായ തായാട്ട് ശങ്കരന്. അനുകാലിക രാഷ്ടീയ വിഷയങ്ങളില്‍ സാമാന്യം നല്ല അറിവ്. സ്വന്തമായൊരു ഭാഷാശൈലി. പ്രശ്‌നങ്ങള്‍ അപഗ്രഹിക്കാനുള്ള മിടുക്ക്. അറിയപ്പെടുന്ന സാഹിത്യകാരന്‍ അദ്ദേഹത്തെതന്നെ ഉറപ്പിച്ചു.
1945ല്‍ പൗരശക്തി പത്രാധിപ സമിതിയിലാണ് പി എ മുഹമ്മദ് കോയ പത്രപ്രവര്‍ത്തനത്തിന് തുടക്കമിട്ടത്.
എന്നാല്‍ അദ്ദേഹത്തിലെ പത്രപ്രവര്‍ത്തകനും എഴുത്തുകാരനും വികാസം പ്രാപിച്ചത് ചന്ദ്രികയിലെ പ്രവര്‍ത്തന കാലത്താണ്. ഇടതുപക്ഷ സഹയാത്രികനാണെന്നറിഞ്ഞിട്ടും പുതുതായി ആരംഭിക്കുന്ന ചന്ദ്രിക ആഴ്ചപ്പതിപ്പിന്റെ ചുമതല അദ്ദേഹത്തെയാണ് സി. എച്ച്മുഹമ്മദ് കോയ ഏല്‍പ്പിച്ചത്. ചരിത്രവും സാഹിത്യവും സ്പോര്‍ട്സും കലയും തുടങ്ങി ഒരു സമ്പൂര്‍ണ വാരികയ്ക്ക് വേണ്ട എല്ലാ വിഭവങ്ങളും മിക്കവാറും പല പേരുകളിലായി എഴുതിയിരുന്നത് പി.എ ആയിരുന്നു.
അധ്യാപകരായ ബാലകൃഷ്ണക്കുറുപ്പും രാമചന്ദ്രനും പാര്‍ട്ട് ടൈം പ്രവര്‍ത്തകരായും എഡിറ്റോറിയല്‍ വിഭാഗത്തില്‍ തുടക്കം മുതലേ ഉണ്ടായിരുന്നു. അല്പനാളുകള്‍ക്കു ശേഷമാണ് 'യുവകല' എന്ന മാസിക സ്വന്തമായി നടത്തിയിരുന്നു ബാബുരാജ് വിപ്ലവത്തിലെത്തുന്നത്. യുവകലമാസികയുടെ ഉപദേശകസമിതിയിലുണ്ടായിരുന്നു തായാട്ട് ശങ്കരന്. ആ പരിചയം വഴിയാണ് ബാബുരാജ് വരുന്നത്.
പുതിയ പത്രത്തിന്റെ പ്രകാശനോല്‍ഘാടന ചടങ്ങില്‍ കെ. പി കേശവമേനോന്‍ അദ്ധ്യക്ഷനായിരുന്നു. കോഴിപ്പുറത്ത് മാധവമേനോനും തെരുവത്ത് രാമനും ആശംസകളര്‍പ്പിച്ചു സംസാരിച്ചു.
തുടക്കത്തില്‍ വിപ്ലവം ഉന്നത നിലവാരം പുലര്‍ത്തി. പ്രതീക്ഷയില്‍ കവിഞ്ഞ പ്രചാരം. ഏതാണ്ട് 30,000 കോപ്പിയോളമുണ്ടായിരുന്നു. 13 ലക്ഷം രൂപ മുടക്കിയാണ് അരനൂറ്റാണ്ട് മുമ്പ് റോട്ടറി പ്രസ് ഓര്‍ഡര്‍ ചെയ്തത്. കോഴിക്കോട്ട് അന്ന് എവിടേയും റോട്ടറി പ്രസ്സ് ഇല്ല.
ഉണ്ണീരിക്കുട്ടിയെക്കുറിച്ച് അല്പം
നാളികേരക്കച്ചവടവും കൃഷിയുമൊക്കെയുള്ള കോഴിക്കോട്ട് വളരെ സമ്പന്നമായ മേലെഅടുവാട്ടില്‍ തറവാട്. അവിടെ എം. എ രാരിച്ചന്‍ എന്ന കോണ്‍ഗ്രസ് അനുഭാവിയുടെ മകനായാണ് ഉണ്ണീരിക്കുട്ടിയുടെ ജനനം. തറവാട്ടിലെ പല വ്യാപാരങ്ങളിലുമായി മുന്നൂറോളം ജോലിക്കാരുണ്ടായിരുന്നു അക്കാലത്ത്. അച്ഛന്‍ കോണ്‍ഗ്രസ് അനുഭാവിയാണെങ്കിലും ഉണ്ണീരിക്കുട്ടിക്ക് നന്നേ ചെറുപ്പം മുതല്‍ കമ്മ്യൂണിസത്തോടായിരുന്നു കമ്പം. ഇത് വീട്ടുകാര്‍ അറിയാനിടയായൊരു സംഭവം ഉണ്ടായി. ഒരുനാള്‍ കുട്ടിയായ ഉണ്ണീരി ലെനിന്റേയും സ്റ്റാലിന്റേയും വലിയ രണ്ട് ചിത്രങ്ങളുമായി വന്ന് വീടിന്റെ പൂമുഖത്ത് ചുമരില്‍ തൂക്കിയിട്ടു. പിറ്റേദിവസമാണ് പിതാവ് രാരിച്ചന്റെ ശ്രദ്ധയില്‍ അത് പെട്ടത്. മകനെ വിളിച്ച് വഴക്കുപറഞ്ഞു. പിന്നെ ചിത്രമെടുത്ത് മാറ്റാനും കല്‍പ്പിച്ചു.
ചുമരില്‍ നിന്നു മാത്രമേ ആ ചിത്രങ്ങള്‍ മാറ്റാന്‍ പിതാവിനായുള്ളു. അന്നുമുതല്‍ ആ രണ്ട് ചിത്രവും ഉണ്ണീരിക്കുട്ടി മനസ്സില്‍ പ്രതിഷ്ടിച്ചു.
19-ാം വയസ്സിലായിരുന്നു ഉണ്ണീരിക്കുട്ടിയുടെ വിവാഹം. കരുവിശ്ശേരി മാടമ്പത്ത് സാമിക്കുട്ടിയുടെ 13 വയസ്സു പ്രായമുള്ള പാഞ്ചാലിക്കുട്ടിയാണ് വധു. അക്കാലങ്ങളില്‍ ബിസിനസ്സില്‍ പിതാവിനെ സഹായിക്കുകമാത്രമായിരുന്നു ഉണ്ണീരിക്കുട്ടിയുടെ ജോലി. എന്നാല്‍ 25-ാം വയസ്സില്‍
രാരിച്ചന്‍ മകനെ വിളിച്ച് 10,000 രൂപ കൈയില്‍ കൊടുത്തുകൊണ്ടു പറഞ്ഞു: നിനക്ക് ഈ പണം കൊണ്ട് സ്വന്തമായി എന്തു ബിസിനസുവേണമെങ്കിലും ചെയ്യാം.
ഒരിക്കലും അഹങ്കരിക്കരുതെന്നും വിനയം വിടരുതെന്നും ജീവിതത്തില്‍ കുറെയൊക്കെ ആദര്‍ശനിഷ്ഠ വേണമെന്നും ആ പിതാവ് ഉണ്ണീരിക്കുട്ടിയെ കൂടെക്കൂടെ ഓര്‍മ്മിപ്പിക്കുമായിരുന്നു. അച്ഛന്റെ ഉപദേശം തെറ്റിനടക്കാന്‍ ഒരിക്കലും ഉണ്ണീരിക്കുട്ടി തയ്യാറുമല്ലായിരുന്നു. എന്നാല്‍ വാശി കറിയാല്‍ വിട്ടുകൊടുക്കുന്ന പ്രശ്‌നവുമില്ല.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!
