ഇനിയുളളത് 31 മത്സരങ്ങൾ, ആദ്യം ചെന്നൈയും മുംബൈയും; ഐപിഎൽ വീണ്ടും തുടങ്ങുമ്പോൾ

കൊവിഡ് രണ്ടാംതരം​ഗത്തെ തുടർന്ന് നിർത്തിവെച്ച ഐപിഎൽ മത്സരങ്ങൾ വീണ്ടും തുടങ്ങുകയാണ്. ഇനി നടക്കാനുളള 31 മത്സരങ്ങളിൽ ആദ്യത്തേത് മുംബൈ ഇന്ത്യൻസും ചെന്നൈ സൂപ്പർ കിങ്സും തമ്മിലായിരിക്കും. സെപ്റ്റംബർ 19 മുതൽ യുഎഇയിൽ നടക്കുന്ന ഐപിഎൽ മത്സരക്രമം ബിസിസിഐ പുറത്തിറക്കി.

ദുബായ്, ഷാർജ, അബുദാബി എന്നിവിടങ്ങളിലെ സ്റ്റേഡിയങ്ങളിലായിട്ടാകും മത്സരങ്ങൾ അരങ്ങേറുക. കൊവിഡ് സുരക്ഷ മുൻനിർത്തി കാണികൾ ഇല്ലാതെ ആയിരിക്കും മത്സരങ്ങൾ. ഇതിൽ 13 മ​ത്സ​ര​ങ്ങ​ൾ ദു​ബായി​ലും പ​ത്ത്​ മ​ത്സ​ര​ങ്ങ​ൾ ഷാ​ർ​ജ​യി​ലും എ​​ട്ടെ​ണ്ണം അ​ബു​ദാബി​യി​ലും അ​ര​ങ്ങേ​റും. ഇ​ന്ത്യ​ൻ സ​മ​യം 3.30നും 7.30​നു​മാ​യി​രി​ക്കും മ​ത്സ​ര​ങ്ങ​ൾ. ഒ​ക്​​ടോ​ബ​ർ 11, 13 ദി​വ​സ​ങ്ങ​ളി​ലാ​ണ്​ എ​ലി​മി​നേ​റ്റ​ർ, ക്വാ​ളി​​ഫ​യ​ർ മത്സരങ്ങൾ. ഒ​ക്​​ടോ​ബ​ർ 15ന് ഫൈ​ന​ൽ. ഇം​ഗ്ലണ്ടിൽ ടെസ്റ്റ് പരമ്പരയിലുളള ഐപിഎൽ താരങ്ങൾ മത്സരത്തിന് ശേഷം മാഞ്ചസ്റ്ററിൽ നിന്ന് ​ദുബായിൽ എത്തും.

നിലവിൽ 29 മത്സരങ്ങളാണ് ഐപിഎല്ലിൽ പൂർത്തിയായത്. ഇനി ശേഷിക്കുന്നത് 31 മത്സരങ്ങളും. എട്ട് മത്സരങ്ങൾ കളിച്ച ഡൽഹി ക്യാപിറ്റൽസാണ് 12 പോയിന്റുമായി ഒന്നാമതുളളത്. പത്ത് പോയിന്റുമായി ചെന്നൈ സൂപ്പർ കിങ്സും ബാം​ഗ്ലൂർ റോയൽ ചലഞ്ചേഴ്സും രണ്ടും മൂന്നും സ്ഥാനങ്ങളിലുണ്ട്.

ഓരോ ദിവസവും കൊവിഡ് ബാധിക്കുന്ന താരങ്ങളുടെ എണ്ണം വര്‍ധിച്ചതോടെയാണ് ഐപിഎല്ലിന്റെ 14ാം സീസണിലെ മത്സരങ്ങള്‍ അനിശ്ചിത കാലത്തേക്ക് നിര്‍ത്തിവെച്ചതായി ബിസിസിഐ അറിയിച്ചത്. സൺറൈസേഴ്സ് വിക്കറ്റ് കീപ്പർ ബാറ്റ്സ്മാൻ വൃദ്ധിമാൻ സാഹ, ഡൽഹി ക്യാപിറ്റൽസ് സ്പിന്നർ അമിത് മിശ്ര, കൊൽക്കത്ത ടീമിലെ വരുണ്‍ ചക്രവർത്തി, സന്ദീപ് വാരിയർ, ചെന്നൈ സൂപ്പർ കിങ്സിലെ ബോളിങ് പരിശീലകൻ ലക്ഷ്മിപതി ബാലാജി ഉൾപ്പെടെ മൂന്നു പേർ, സ്റ്റേഡിയത്തിലെ ​ഗ്രൗണ്ട് സ്റ്റാഫുകൾ എന്നിങ്ങനെ നിരവധി പേർക്കാണ് കൊവിഡ് ബാധിച്ചത്. ആ​ദ്യം  രണ്ട് മത്സരങ്ങൾ മാറ്റിയിരുന്നു. പിന്നീടാണ് ടൂർണമെന്റ് തന്നെ നിർത്തിവെക്കുകയാണെന്ന് ബിസിസിഐ വൈസ് പ്രസിഡന്റ് രാജീവ് ശുക്ല അറിയിച്ചത്.