2018ലെ പ്രളയകാലത്ത് റിവര്‍ ഫ്‌ളഡും റ്റൈഡല്‍ ഫ്‌ളഡും കൂടി ഒത്തുചേരുന്നൊരു സാഹചര്യം ഉണ്ടായിരുന്നില്ല. ഇനി അത് വരികയാണെങ്കില്‍ നമ്മുടെ സ്ഥിതി വളരെ പരിതാപകരമാകും. നദിയിലെ നീരൊഴുക്ക് കൂടുകയും ഹൈ റ്റൈഡ് കൂടി നിന്നാല്‍ വെളളം പുറത്തേക്ക് പോകില്ല. ഭീകരമായ അവസ്ഥയാകും ഉണ്ടാകുക. അത് ഇവര്‍ ആരും കാണുന്നില്ല. ഇത് മുന്‍കൂട്ടി കണ്ടുകൊണ്ട് നടപടികള്‍ ഉണ്ടാകണം. സമുദ്ര ജലനിരപ്പിന് താഴെയുളള ഇന്ത്യയിലെ തന്നെ ആദ്യത്തെ സ്ഥലം ആയിരിക്കും വെളളത്തിലാകുക. അതിന് എന്ത് തയ്യാറെടുപ്പുകള്‍ നാം നടത്തുന്നുണ്ട്? എന്ത് ചെയ്യുന്നുണ്ട്? പഠിക്കുന്നുണ്ടോ? പഠിക്കുന്ന വിവരങ്ങള്‍ ഉള്‍ക്കൊളളുന്നുണ്ടോ? ഞങ്ങളുടെ പഠനത്തില്‍ വേനല്‍ക്കാലത്തും കുട്ടനാട്ടിലേക്ക് ഉപ്പുവെളളം കയറുകയാണ്. ഉപ്പിന്റെ തോത് കൂടുതലാണ്. ബണ്ട് കൊണ്ടൊന്നും രക്ഷയില്ല. പരിസ്ഥിതിയോട് ഇണങ്ങിപോകുന്നതാണ് അനുയോജ്യമെന്ന് മനസിലാക്കിയുളള ഭൂ വിനിയോഗവും നിര്‍മ്മാണങ്ങളും കൃഷി രീതികളും ഒക്കെ കൂട്ടിയോജിപ്പിച്ചാലേ ചെറുതായെങ്കിലും നമുക്ക് ഇതിനെ പ്രതിരോധിക്കാൻ സാധിക്കുകയുളളൂ എന്നും ഡോ. പദ്മകുമാർ വ്യക്തമാക്കുന്നു.
ഇന്ത്യയുടെ പ്രഥമ കാലാവസ്ഥാ വിലയിരുത്തല്‍ റിപ്പോര്‍ട്ട് അനുസരിച്ച് 1901-2004 കാലയളവില്‍ സമുദ്രജലനിരപ്പ് ഓരോ വര്‍ഷവും 1.06-1.75 മില്ലി മീറ്റര്‍ ഉയര്‍ന്നിട്ടുണ്ട്. 2004 മുതല്‍ വാര്‍ഷിക വര്‍ധന 3.3 മില്ലിമീറ്റര്‍ ആണ്. താരതമ്യേന താപനില കുറഞ്ഞിരുന്ന അറബിക്കടലില്‍ ആഗോളതാപനം വഴി ചൂട് കൂടിയതിനാല്‍ 2014 മുതല്‍ എല്ലാവര്‍ഷവും ഒരു കൊടുങ്കാറ്റെങ്കിലും ഉണ്ടാവുന്നുണ്ട്. അറബിക്കടലില്‍ 1951-2018 കാലഘട്ടത്തില്‍ ഒക്ടോബര്‍, ഡിസംബര്‍ മാസങ്ങളില്‍ കൊടുങ്കാറ്റുകളുടെ എണ്ണം 52 ശതമാനം വര്‍ധിച്ചിട്ടുണ്ട്. ചുരുക്കത്തില്‍ കാലാവസ്ഥാ പഠനങ്ങള്‍ എല്ലാം വ്യക്തമാക്കുന്ന രണ്ട് കാര്യങ്ങള്‍ ഇവയാണ്. അറബിക്കടലില്‍ ചൂട് കൂടുന്നത് കൊണ്ട് തന്നെ വരും നാളുകളില്‍ ശക്തമായ ചുഴലിക്കാറ്റുകളും കടല്‍ക്ഷോഭവും പ്രതീക്ഷിക്കാം.
തീരശോഷണത്തിനും അനുബന്ധ പ്രശ്‌നങ്ങള്‍ക്കും പുറമെ ഇത് മേഖലയിലെ സമുദ്രോല്‍പ്പന്ന ലഭ്യതയെയും തീരദേശ ജനതയുടെ ആരോഗ്യത്തെയും ബാധിച്ചേക്കാം. നൂറ്റാണ്ടിന്റെ അവസാനത്തോടെ സമുദ്രജലനിരപ്പ് ഒരു മീറ്റര്‍ വരെയോ, അതിലധികമോ ഉയരാന്‍ സാധ്യതയുണ്ട്. കൊച്ചി, കുട്ടനാട് പ്രദേശങ്ങളില്‍ ഇത് ദൂരവ്യാപകമായ പ്രതിസന്ധികള്‍ സൃഷ്ടിച്ചേക്കാം. അതുകൊണ്ട് തന്നെ കാലാവസ്ഥാമാറ്റവും കൂടി ഉള്‍ക്കൊണ്ട് കൊണ്ടുളള സമഗ്രതീരദേശ പരിപാലന പദ്ധതികള്‍ അനിവാര്യമാണെന്നാണ് കേരളത്തിലെ തീരശോഷണത്തെ മുൻനിർത്തി ഡോ. ബിജുകുമാർ, ഡോ. കെ.വി തോമസ്, ഡോ. അജയകുമാർ വർമ്മ, ഡോ. ടി.വി സജീവ്, ഡോ. ഷാജി ഇ എന്നിങ്ങനെ അഞ്ച് ശാസ്ത്രജ്ഞൻമാർ നടത്തിയ അവലോകനത്തിലും വ്യക്തമാക്കുന്നത്.
വേമ്പനാട്ട് കായലിലെ ഉപ്പുരസത്തെക്കുറിച്ചും മലിനീകരണത്തെക്കുറിച്ച് നിരന്തരം പഠിച്ചുകൊണ്ടിരിക്കുന്ന സ്ഥാപനമാണ് തങ്ങളുടേതെന്നും അതിൽ നിന്നും ലഭിക്കുന്ന വിവരങ്ങൾ ഞെട്ടിക്കുന്നതാണെന്നും ഡോ. പദ്മകുമാർ പറയുന്നു. ഈ കൊവിഡ് കാലത്തും 15 ദിവസം കൂടുമ്പോള്‍, ഞങ്ങള്‍ സാംപിളുകള്‍ എടുക്കാറുണ്ട്. ഞങ്ങളുടെ റിസര്‍ച്ചേഴ്‌സ് ബോട്ടിലും വളളത്തിലും വണ്ടിയിലുമൊക്കെയായി ഇതിനായി പോകുന്നുണ്ട്. ജൈവ മലിനീകരണത്തിന്റെ തോത് വളരെ വലിയ രീതിയിലാണുളളത് കുട്ടനാട്ടിൽ. വെളളത്തില്‍ സാധാരണ ഫോസ്‌ഫേറ്റ് കുറഞ്ഞും നൈട്രേറ്റ് കൂടുതലുമാണ് വേണ്ടത്. എന്നാൽ ഇപ്പോള്‍ ഇത് രണ്ടും വളരെ കൂടുതലാണ്. അതുകൊണ്ടാണ് പോള പെരുകുന്നത്. പോള ഒരു രോഗലക്ഷണമാണ്, വെളളത്തില്‍ മലിനീകരണം കൂടുന്നത് കൊണ്ടാണ് കുളവാഴയും പോളയും അടക്കം പെരുകുന്നത്. അത് നിയന്ത്രിക്കാനുളള വഴി ആലോചിക്കണം. കടല്‍ അടുത്തുളളതിനാൽ അത് സാധ്യവുമാണ്.
തീരശോഷണം ഏറ്റവുമധികം ജനങ്ങളെ ബാധിക്കാന്‍ സാധ്യതയുളളത് ആലപ്പുഴയിലും തിരുവനന്തപുരം ജില്ലയിലുമാണെന്നാണ് കേരളത്തിലെ ശാസ്ത്രജ്ഞരുടെ വിലയിരുത്തൽ. ആലപ്പുഴ ജില്ലയോട് ചേര്‍ന്ന് കിടക്കുന്ന കുട്ടനാടിനും അപകട ഭീഷണി കൂടുതലാണ്. 1,100 ചതുരശ്ര കിലോമീറ്റര്‍ ചുറ്റളവുളള കുട്ടനാടിന്റെ 304 ചതുരശ്ര കിലോമീറ്റര്‍ സമുദ്രനിരപ്പിന് താഴെയാണ്, നിലവില്‍ ജനങ്ങള്‍ താമസിക്കുന്നത് വെളളക്കെട്ട് നിറഞ്ഞ പ്രദേശങ്ങളിലാണ്. അവരുടെ കൃഷിയും മറ്റ് ഉപജീവന മാര്‍ഗങ്ങളും എപ്പോഴും വെളളപ്പൊക്ക ഭീഷണിയിലും ഉപ്പുവെളളം കയറലിലും കെട്ടുപിണഞ്ഞ് കിടക്കുകയാണ്.
കേരളത്തില്‍ തുറമുഖ പുലിമുട്ടുകളില്‍ മിക്കവയുടെയും വടക്കുഭാഗത്ത് രൂക്ഷമായ തീരശോഷണമാണെങ്കിൽ തെക്കുഭാഗത്ത് തീരത്തിന് കുഴപ്പമൊന്നും ഉണ്ടാകുന്നില്ല, കൂടുതൽ മണൽ വന്ന് അടിയുകയും ചെയ്യുന്നുണ്ട്. കേരളത്തില്‍ അങ്ങോളമിങ്ങോളമുളള പുലിമുട്ടുകള്‍ പരിശോധിച്ചാൽ തീരംവയ്പ്പിനെക്കാള്‍ തീരശോഷണത്തിന് കാരണമായിട്ടുണ്ടെന്നാണ് മനസിലാക്കാനാവുക. മനുഷ്യനിർമ്മിത പ്രവൃത്തികൾക്ക് പുറമെ പ്രാദേശികമായുളള പരിസ്ഥിതിയുടെ സന്തുലനാവസ്ഥ നഷ്ടപ്പെടുന്നതും തീരശോഷണത്തിന് കാരണമാകാറുണ്ട്.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!
Related Stories
നമ്മുടെ കാലവസ്ഥയ്ക്ക് എന്താണ് സംഭവിക്കുന്നത്?