വിയ്യൂര്‍ ജയിലില്‍ നടന്ന പോലീസ് മര്‍ദനത്തെക്കുറിച്ചു മാധ്യമങ്ങളോടും മനുഷ്യാവകാശ പ്രവര്‍ത്തകരോടും പറഞ്ഞു എന്ന് ആരോപിച്ചു സെപ്റ്റംബര്‍ 12-ാം തിയതി ഡാനിഷ് എന്ന മാവോയിസ്റ്റ് വിചാരണ തടവുകാരനെ ജയിലധികൃതര്‍ ഭീഷണിപ്പെടുത്തിയതായി ജനകീയ മനുഷ്യാവകാശ പ്രസ്ഥാനം ആരോപിച്ചു. സംഭവത്തില്‍ പ്രതിഷേധിച്ചു സംസ്ഥാന മനുഷ്യാവകാശ കമ്മീഷനു പരാതിയും നല്‍കിയിട്ടുണ്ട്. സെപ്റ്റംബര്‍ 4ാം തിയതി വിയ്യൂര്‍ അതിസുരക്ഷാ ജയിലില്‍ മയക്കുമരുന്ന് കേസില്‍ തടവില്‍ കഴിയുന്ന ഹര്‍ഷദ് എന്ന കണ്ണൂര്‍ സ്വദേശിയെ ജയിലധികൃതര്‍ അതിക്രൂരമായി മര്‍ദിച്ചു എന്ന് അയാളുടെ പിതാവ് മാധ്യമങ്ങളോട് പറഞ്ഞിരുന്നു. ജയിലധികൃതര്‍ വീട്ടിലേക്ക് വിളിക്കാനുള്ള അനുമതി നിഷേധിച്ചതിനെ തുടര്‍ന്നു നിരാഹാരസമരത്തിലായിരുന്ന ഹര്‍ഷദ് പിന്നീട് അധികൃതര്‍ അനുവാദം നല്‍കിയതിനെ തുടര്‍ന്നാണ് സമരം അവസാനിപ്പിച്ചത്. സമരം അവസാനിപ്പിച്ച ഹര്‍ഷാദിനെ ജയില്‍ ഉദ്യോഗസ്ഥര്‍ ക്രൂരമായി മര്‍ദിച്ചു എന്നാണു അദ്ദേഹത്തിന്റെ പിതാവ് ആരോപിച്ചത്. സംഭവത്തെ തുടര്‍ന്നു തൃശ്ശൂര്‍ മെഡിക്കല്‍ കോളേജില്‍ അഡ്മിറ്റായ ഹര്‍ഷാദിനെ ഒന്നര ദിവസം കഴിഞ്ഞാണു ഡിസ്ചാര്‍ജ് ചെയ്തത്. മര്‍ദന വിവരം മറച്ചു പിടിച്ച അധികൃതര്‍ അപസ്മാര രോഗിയെന്നു പറഞ്ഞാണ് പ്രതിയെ ആശുപത്രിയില്‍ അഡ്മിറ്റ് ചെയ്തത്. ഡാനിഷ് ആണ് ഈ വിഷയം മനുഷ്യാവകാശ പ്രവര്‍ത്തകരെ അറിയിച്ചത് എന്ന് ആരോപിച്ചായിരുന്നു പോലീസിന്റെ ഭീഷണിയെന്നും ബന്ധുക്കളും മനുഷ്യാവകാശ പ്രവര്‍ത്തകരും ആരോപിക്കുന്നു
വയനാട്ടിലെ ഒരു പോലിസുദ്യോഗസ്ഥന്റെ വീട്ടില്‍ അതിക്രമിച്ചു കയറി തോക്കു ചൂണ്ടി ഭീഷണിപ്പെടുത്താനും അയാളുടെ ബൈക്ക് കത്തിക്കുവാനും ശ്രമിച്ച മാവോയിസ്റ്റുകള്‍ക്ക് ഭക്ഷണവും ആയുധവും എത്തിച്ചു കൊടുത്തു എന്ന കുറ്റത്തിന്റെ പേരില്‍ 2015 ജൂലൈയില്‍ അറസ്റ്റ് ചെയ്യപെട്ട ഇബ്രാഹിമിന്റെ വിചാരണ തുടങ്ങിയത് 2021 ജൂണിലാണ്. കലശലായ പ്രമേഹവും ഹൃദയ സംബന്ധിയായ അസുഖങ്ങളും കാരണം ഏതാണ്ട് 22ഓളം ഗുളികകളാണ് ഇബ്രാഹിം ദിവസവും കഴിക്കുന്നത്. പ്രമേഹ ചികിത്സയുടെ ഭാഗമായി പല്ലുകള്‍ മുഴുവന്‍ നീക്കം ചെയ്യപെട്ട ഇബ്രാഹിം ചൂടുവെള്ളത്തില്‍ ചപ്പാത്തി മുക്കി കഴിച്ചാണ് അതിജീവിക്കുന്നത് എന്ന് മകന്‍ നൗഫല്‍ പറഞ്ഞു. ജയിലില്‍ വെച്ച് രണ്ടു തവണ ഹൃദ്രോഗം അനുഭവിച്ച ഇബ്രാഹിം സമര്‍പ്പിച്ച ആറിലധികം ജാമ്യാപേക്ഷകള്‍ കോടതി തള്ളിക്കളഞ്ഞു. കോവിഡ് കാരണം ജയിലുകളിലെ ആളുകളുടെ എണ്ണം വെട്ടിച്ചുരുക്കുന്നതിന്റെ ഭാഗമായി ആയിരക്കണക്കിന് തടവുകാര്‍ക്ക് ഇടക്കാല ജാമ്യവും പരോളും അനുവദിച്ചിരുന്നു കേരള സര്‍ക്കാര്‍. സിസ്റ്റര്‍ അഭയാ കൊലക്കെസിലും ടി പി ചന്ദ്രശേഖരന്‍ വധക്കേസിലും പെട്ട പ്രതികള്‍ക്ക് ഇതിന്റെ പേരില്‍ ജാമ്യം ലഭിച്ചപ്പോള്‍ ആരോഗ്യപരമായ പ്രശ്‌നങ്ങള്‍ നേരിടുന്ന വയനാട്ടില്‍ നിന്നുള്ള തോട്ടം തൊഴിലാളിയായ ഇബ്രാഹിമിനെ പോലുള്ള രാഷ്ട്രീയ തടവുകാര്‍ക്ക് നിരന്തരം നീതി നിഷേധിക്കപ്പെടുകയാണെന്നാണ് ആരോപണം.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!
