താരങ്ങളെ രാജ്യാന്തര മത്സരങ്ങളിൽ നിന്ന് വിലക്കുമെന്ന് ഫിഫയുടെ ഭീഷണി

യൂറോപ്യൻ  സൂപ്പർ ലീഗ് മത്സരങ്ങളിൽ പങ്കെടുത്താൽ താരങ്ങളെ രാജ്യാന്തര മത്സരങ്ങളിൽ പങ്കെടുക്കുന്നതിൽ നിന്ന് വിലക്കുമെന്ന് ഫിഫയുടെ ഭീഷണി. ലോകത്തിലെ ഏറ്റവും വലിയ ക്ലബ്ബുകളെ പങ്കെടുപ്പിച്ചുകൊണ്ട് യൂറോപ്യൻ സൂപ്പർ ലീഗ് സംഘടിപ്പിക്കുന്നതിനെക്കുറിച്ചുള്ള ആലോചനയെയാണ് ഫിഫ മുളയിലേ നുള്ളിയത്. 

തങ്ങളുടെ കോണ്ടിനെന്റൽ നയങ്ങളെ ലംഘിക്കുന്നതാണ് യൂറോപ്യൻ സൂപ്പർ ലീഗ് എന്നാണ് ഫിഫയുടെ നിലപാട്. സ്പാനിഷ് ലീഗിലെ വമ്പന്മാരായ ബാഴ്‌സലോണ റയൽ മാഡ്രിഡ് എന്നിവരടക്കം വലിയ ക്ലബ്ബുകളാണ് യൂറോപ്യൻ സൂപ്പർ ലീഗ് പദ്ധതിയിൽ ഭാഗമായിട്ടുള്ളത്. അതേസമയം ജർമൻ ബുണ്ടസ്‌ലീഗയിലെ വമ്പന്മാരായ ബയേൺ മ്യൂണിക് പദ്ധതിയെ എതിർത്തു.

യുവേഫയും ലാ ലീഗയും യൂറോപ്യൻ സൂപ്പർ ലീഗ് എന്ന ആശയത്തിന് എതിരാണ്. യുവേഫ പ്രസിഡന്റ് അലക്‌സാണ്ടർ സെഫെറിനും ലാ ലീഗ പ്രസിഡന്റ് ഹാവിയർ ടെബാസും തങ്ങളുടെ നിലപാട് പരസ്യമായി അറിയിച്ചിട്ടുണ്ട്. മത്സരത്തിൽ പങ്കെടുക്കുന്ന ക്ലബ്ബുകളിലെ താരങ്ങളെ രാജ്യാന്തര മത്സരങ്ങളിൽ നിന്ന് വിലക്കുമെന്ന് ഫിഫ വ്യക്തമാക്കിയതോടെ ക്ലബ്ബുകൾക്കുമേൽ കടുത്ത സമ്മർദ്ദമാണ് ഫിഫ ചെലുത്തുന്നത്.