കോപ്പയുടെ ചരിത്രം പരിശോധിച്ചാൽ പത്ത് തവണയാണ് അർജന്റീനയും ബ്രസീലും തമ്മിൽ ഫൈനൽ കളിച്ചിട്ടുളളത്. 1975ന് ശേഷം രണ്ട് തവണ ഏറ്റുമുട്ടിയപ്പോഴും കിരീടം ബ്രസീലിനായിരുന്നു. 2004ൽ നിശ്ചിത സമയത്ത് ഇരുടീമുകളും രണ്ട് ഗോളുകൾ വീതം അടിച്ചപ്പോൾ പെനാൽറ്റി ഷൂട്ടൗട്ടിലായിരുന്നു ബ്രസീൽ വിജയിച്ചത്. ഏറ്റവും അവസാനം 2007ൽ നടന്ന പോരാട്ടത്തിൽ അർജന്റീനയെ എതിരില്ലാത്ത മൂന്ന് ഗോളുകൾക്കാണ് ബ്രസീൽ പരാജയപ്പെടുത്തിയത്. റോബര്‍ട്ടോ അയാളയും റിക്വെല്‍മിയും ലയണല്‍ മെസിയും അടങ്ങിയ സംഘമായിരുന്നു അന്ന് തോൽവി ഏറ്റുവാങ്ങിയത്. എന്നാല്‍ ടൂര്‍ണമെന്റില്‍ നേര്‍ക്കുനേര്‍ വന്ന ഫൈനലുകൾ പരിശോധിച്ചാൽ ആധിപത്യം അര്‍ജന്റീനയ്ക്കാണ്. ഇരുവരും ഏറ്റുമുട്ടിയ 1921, 1925, 1937, 1945, 1957, 1959, 1991 ഫൈനലുകളില്‍ അര്‍ജന്റീനയ്ക്കായിരുന്നു വിജയം.
കോപ്പയിൽ ഇതുവരെ ഒൻപത് തവണ ചാംപ്യൻമാരായ ബ്രസീൽ പത്താം കിരീടമാണ് ലക്ഷ്യമിടുന്നത്. അവസാനം നടന്ന കോപ്പയിൽ പെറുവിനെ എതിരില്ലാത്ത മൂന്ന് ഗോളുകൾക്ക് തോൽപ്പിച്ചായിരുന്നു ബ്രസീൽ കിരീടം ഉയർത്തിയത്. 28 തവണ കോപ്പയുടെ ഫൈനലിൽ കളിച്ചിട്ടുളള അർജന്റീന 14 തവണ ഇതുവരെ ചാംപ്യൻമാരായിട്ടുണ്ട്. 1993ലാണ് അർജന്റീന അവസാനമായി കോപ്പയിലെ ചാംപ്യൻമാരായത്.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!
