അർജന്റീന 1993ൽ കോപ്പ അമേരിക്ക നേടുമ്പോഴും ഇന്ത്യ 1983ൽ ഏകദിന ക്രിക്കറ്റ് കിരീടം സ്വന്തമാക്കുമ്പോഴും ഇന്ത്യയിൽ കളർ ടെലിവിഷനുകൾ പ്രചാരത്തിൽ എത്തിയിരുന്നില്ല. അർജന്റീന ടീമിനെ എതിരാളികൾ ഇതുവരെ പരിഹസിച്ചിരുന്നത് കളർടിവി വന്നതിന് ശേഷം ഒരു കപ്പെങ്കിലും നേടിയിട്ടുണ്ടോ എന്നായിരുന്നു. അതുപോലെ ലോകം മുഴുവൻ അറിയപ്പെടുന്ന, ഒരുവിധപ്പെട്ട റെക്കോഡുകൾ എല്ലാം നേടിയിരുന്ന ഇന്ത്യയുടെ മാസ്റ്റർ ബ്ലാസ്റ്റർ സച്ചിൻ തെൻഡുൽക്കർക്ക് ലോക കിരീടം സ്വന്തമാക്കാനായി ഏകദിന ക്രിക്കറ്റിൽ അരങ്ങേറിയതിന് ശേഷം 22 വർഷങ്ങൾ വേണ്ടി വന്നു.
ക്രിക്കറ്റിന്റെ ഈറ്റില്ലമായ ഇംഗ്ലണ്ടിലെ ലോർഡ്സിൽ 1983ൽ നടന്ന ഫൈനലിൽ അന്നത്തെ മികച്ച ടീമായിരുന്ന വെസ്റ്റ് ഇൻഡീസിനെ തോൽപ്പിച്ചാണ് കപിൽദേവിന്റെ നേതൃത്വത്തിലുളള ഇന്ത്യൻ ടീം ആദ്യമായി ലോകകിരീടം സ്വന്തമാക്കുന്നത്. ആദ്യം ബാറ്റ് ചെയ്ത ഇന്ത്യ 183 റൺസിന് പുറത്തായെങ്കിലും വിൻഡീസിനെ 140 റൺസിന് എറിഞ്ഞ് ഒതുക്കുകയായിരുന്നു. 18 വിക്കറ്റുകൾ വീഴ്ത്തിയ ഇന്ത്യൻ മീഡിയം പേസറായ റോജർ ബിന്നിയായിരുന്നു അന്ന് ടൂർണമെന്റിലെ ലീഡിങ് വിക്കറ്റ് ടേക്കർ. ഈ ലോകകപ്പ് വിജയമാണ് ഇന്ത്യയിൽ വലിയ രീതിയിൽ ക്രിക്കറ്റ് വളരാനുളള ആവേശം നിറച്ചത്.
ആ ബ്ലാക്ക് ആൻഡ് വൈറ്റ് ടിവി കാലഘട്ടത്തിൽ നിന്ന് ഇന്ത്യ രണ്ടാമതൊരു ഏകദിന കിരീടം നേടുന്നത് 2011ൽ മഹേന്ദ്രസിങ് ധോണി നായകനായ ഇന്ത്യൻ ടീമിലൂടെയാണ്. ഇന്ന് അർജന്റീനയുടെ വിജയം ആഘോഷിക്കുന്നത് പോലെ 28 വർഷങ്ങൾക്ക് ശേഷം. മാസ്റ്റർ ബ്ലാസ്റ്റർ സച്ചിൻ തെൻഡുൽക്കർ 18 റൺസിനും സേവാഗ് പൂജ്യത്തിനും പുറത്തായെങ്കിലും ഗംഭീറും പിന്നീട് എത്തിയ നായകൻ ധോണിയും ചേർന്ന് ശ്രീലങ്കയ്ക്കെതിരെ ഇന്ത്യയെ ത്രസിപ്പിക്കുന്ന വിജയത്തിലേക്ക് നയിച്ചു. ജന്മനാട് കൂടിയായ മുംബൈയിലെ വാങ്കഡെ സ്റ്റേഡിയത്തിൽ സ്വന്തമാക്കിയ ആ വിജയത്തെ തന്റെ ക്രിക്കറ്റ് ജീവിതത്തിലെ മഹത്തായ ദിവസമെന്നാണ് സച്ചിൻ വിശേഷിപ്പിച്ചത്. ക്രിക്കറ്റ് ഇതിഹാസത്തിന് ടീം ഇന്ത്യയുടെ സമ്മാനം കൂടിയായിരുന്നു ആ വിജയം.
അതുപോലൊരു വിജയമാണ് ഇന്ന് എയ്ഞ്ചൽ ഡീ മരിയയുടെ ഗോളിലൂടെ അർജന്റീന മെസിക്കായി സ്വന്തമാക്കിയതും. വേൾഡ് കപ്പും കോപ്പയും അടക്കം നാല് ഫൈനലുകൾ കളിച്ചിട്ടും അന്താരാഷ്ട്ര കിരീടം മാത്രം മെസിക്ക് അന്യമായിരുന്നു. ലോക ഫുട്ബോളിന്റെ നെറുകയിൽ നിൽക്കവെ 34ാം വയസിൽ ഒടുവിൽ ആ കിരീടവും മെസിയിലേക്ക് എത്തി.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!
