എന്നാല്‍ ദുരന്തങ്ങളില്‍ രക്ഷകരാവുന്ന, എല്ലാവരും പ്രശംസിക്കുന്ന മത്സ്യത്തൊഴിലാളികളുടെ ജീവിതം എങ്ങനെയാണ് മുന്നോട്ട് പോവുന്നത്? മാറി വരുന്ന കാലാവസ്ഥയും തൊഴില്‍ സാഹചര്യവും അവരുടെ ജീവിതത്തെ ഏത് തരത്തിലാണ് മാറ്റിയിരിക്കുന്നത്? 'ആര്‍ക്കും അതറിയണ്ട. ഞങ്ങള്‍ എല്ലാവര്‍ക്കുമായി എത്തും. പക്ഷെ ഞങ്ങള്‍ക്ക് ഒരു ആവശ്യം വന്നാല്‍, വിഷമമുണ്ടായാല്‍ ആരുമുണ്ടാവില്ല. മത്സ്യത്തൊഴിലാളി രക്ഷകനാണെന്ന് അഭിമാനത്തോടെ പറയുന്നവര്‍ക്ക് അവന്റെ വീട്ടില്‍ അടുപ്പെരിയുന്നുണ്ടോ എന്ന് ആര്‍ക്കും അറിയണ്ട..' പ്രബീഷ് പറഞ്ഞു നിര്‍ത്തി.
'കാലാകാലങ്ങളായി കടം പേറി ജീവിക്കുന്നവരാണ് മത്സ്യത്തൊഴിലാളികള്‍. എന്നാലും പണിക്ക് പോയി കാശ് കിട്ടുമ്പോള്‍ അത് തിരിച്ചടക്കും പണയം വച്ചതെല്ലാം തിരിച്ചെടുക്കും. പണിയുണ്ടാവും എന്ന പ്രതീക്ഷയിലാണ് കടം വാങ്ങുന്നതും. പക്ഷേ ഇപ്പോള്‍ തീരനിവാസികള്‍ക്കിടയില്‍ വലിയ കൊള്ള നടക്കുകയാണ്. അഞ്ചോ ആറോ മൈക്രോ ഫിനാന്‍സ് സംവിധാനങ്ങളുണ്ട്. ഒന്നില്‍ നിന്ന് കടമെടുത്ത് മറ്റേതില്‍ അടക്കും. അങ്ങനെ കടം മേടിച്ച് കടം തീര്‍ത്ത് പിന്നേയും കടം മേടിച്ച്... അങ്ങനെ പോവുകയാണ് മത്സ്യത്തൊഴിലാളികള്‍. പലിശക്കാരുടെ വലിയ ശൃംഖലയ്ക്കുള്ളില്‍ കുടുങ്ങിക്കിടക്കുകയാണ് ബഹുഭൂരിപക്ഷം വരുന്ന തൊഴിലാളികളും. ചെറിയ മീനിട്ട് വലിയ മീനുകളെ പിടിക്കാനാണ് പലിശക്കാരും ഉദ്ദേശിച്ചിരിക്കുന്നത്. തിരിച്ചടവിന് വേറെ വഴിയെന്തുണ്ട്? കാറ്റ്, മഴ എന്നൊക്കെ പറഞ്ഞ് ഞങ്ങളെ കടലിലേക്ക് ഇറക്കില്ല. ഞങ്ങളുടെ സുരക്ഷിതത്വമാണ് അവര്‍ പറയുന്നത്. അത് അംഗീകരിക്കുന്നു. പക്ഷേ അതോടെ മുഴു പട്ടിണിയിലായ ഞങ്ങള്‍ക്ക് വേണ്ടി എന്തെങ്കിലും പാക്കേജ് പ്രഖ്യാപിക്കാന്‍ സര്‍ക്കാരിന് ഉത്തരവാദിത്തമില്ലേ?' സൈജു വില്‍സണ്‍ ചോദിച്ചു.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!
