ബാഴ്‌സലോണയുടെ ഫ്രഞ്ച് താരം യൂറോ കപ്പ് സ്‌ക്വാഡിൽ നിന്ന് പുറത്ത്

ബാഴ്‌സലോണയുടെ ഫ്രഞ്ച് താരം ഒസ്മാൻ ഡെംബലെ യൂറോ കപ്പിനായുള്ള ഫ്രഞ്ച് സ്‌ക്വാഡിൽ നിന്ന് പുറത്ത്. ഹംഗറിക്കെതിരായ മത്സരത്തിൽ ഏറ്റ പരുക്കാണ് ഇരുപത്തിനാലുകാരന്റെ യൂറോകപ്പ് മോഹങ്ങൾക്ക് വിനയായത്. 

ഹംഗറിക്ക് എതിരായ മത്സരത്തിന്റെ രണ്ടാം പകുതിയിൽ പകരക്കാരനായി ഇറങ്ങിയ ഡെംബലെക്ക് 87മിനിറ്റിൽ പരുക്ക് കാരണം പുറത്തു പോകേണ്ടി വന്നിരുന്നു. മത്സരശേഷം ആശുപത്രിയിൽ ചികിത്സ തേടിയ ഡെംബലെയുടെ പരുക്ക് സാരമാണെന്ന് തിരിച്ചറിഞ്ഞു. തുടർന്ന് യൂറോ കപ്പിൽ കളിക്കാനാകാത്ത താരത്തെ തിരിച്ചയക്കാൻ ഫ്രഞ്ച് ടീം തീരുമാനിക്കുകയായിരുന്നു.

മെസിക്കും ഗ്രീസ്മാനുമൊപ്പം ബാഴ്‌സലോണ മുന്നേറ്റനിരയിൽ അണിനിരക്കുന്ന താരത്തിന്റെ കാൽ മുട്ടിനാണ് പരുക്ക് പറ്റിയിരിക്കുന്നതെന്ന് ഫ്രഞ്ച് പരിശീലകൻ ദിദിയർ ദെശാംപ് വ്യക്തമാക്കി. ഹംഗറിക്കെതിരായ മത്സരത്തിൽ ലഭിച്ച അവസരം നല്ല രീതിയിൽ ഉപയോഗപ്പെടുത്തിയ താരത്തിന്റെ പരുക്ക് ഫ്രഞ്ച് ടീമിനും തിരിച്ചടിയാണ്.