എസി റോഡില്‍ പുതിയതായി നിര്‍മ്മിക്കുന്ന ഹൈവേയെ കുട്ടനാട്ടിലെ എലിവേറ്റഡ് ഹൈവേ എന്നാണ് വിശേഷിപ്പിക്കപ്പെടുന്നത്. കേരള പുനര്‍നിര്‍മ്മാണ പദ്ധതിയില്‍ ഉള്‍പ്പെടുത്തി അതിവേഗം നിര്‍മ്മാണ പ്രവര്‍ത്തനങ്ങള്‍ നടത്തുകയാണ് ഇവിടെ. 13 ചെറിയ പാലങ്ങളാണ് നവീകരണത്തോട് അനുബന്ധിച്ച് 14 മീറ്റര്‍ വീതിയില്‍ പുനര്‍നിര്‍മ്മിക്കുന്നത്. തൂണുകളുടെ പൈലിങ് ജോലികള്‍ ഏകദേശം പൂര്‍ത്തിയായി. ഇതില്‍ ആദ്യം പൊളിക്കുന്നത് കളര്‍കോട് പക്കി പാലവും പൊങ്ങ പാലവുമാണ്. മഴയും വെളളക്കെട്ടും അടക്കമുളള പ്രശ്‌നങ്ങള്‍ വരുന്ന രണ്ട് മാസങ്ങള്‍ക്കുളളില്‍ ഉണ്ടായില്ലെങ്കില്‍ മാത്രമാണ് 70 ദിവസം കൊണ്ട് പുനര്‍നിര്‍മ്മാണം പൂര്‍ത്തിയാക്കാം എന്ന് അധികൃതര്‍ കണക്കുകൂട്ടുന്നത്. അതേസമയം കളര്‍കോട് പക്കി പാലത്തിന് സമാന്തരമായി തദ്ദേശീയര്‍ക്ക് അടക്കം കടന്നുപോകാന്‍ സമാന്തര പാതയൊന്നും ഇതുവരെ നിര്‍മ്മിച്ചിട്ടുമില്ല. ദീര്‍ഘദൂര വാഹനങ്ങളും ഭാരവണ്ടികളും വഴിതിരിച്ച് വിടുമെങ്കിലും ആംബുലന്‍സും ചെറുവാഹനങ്ങളും പോകാനുളള സൗകര്യം ഉണ്ടാക്കേണ്ടതുണ്ട്.
റംഷാദിന് സമയനഷ്ടമാണ് ഉണ്ടാകുന്നത് എങ്കില്‍ ആലപ്പുഴ-ചങ്ങനാശേരി റൂട്ടിലൂടെ ആഴ്ചയില്‍ മിക്ക ദിവസവും ഓട്ടം പോകേണ്ടി വന്നിരുന്ന ടിപ്പര്‍ ലോറി ഡ്രൈവറായ അഖിലിന്റെ അവസ്ഥ ഇതിലും കഷ്ടമാണ്. മുന്‍പ് കളര്‍കോട് നിന്നും എസി റോഡില്‍ കേറി കഴിഞ്ഞാല്‍ നീണ്ടുനിവര്‍ന്ന് കിടക്കുന്നത് കൊണ്ട് ഒരൊറ്റ വിടല്‍ വിട്ടാല്‍ മതിയായിരുന്നു. ഇപ്പോള്‍ വലിയ വാഹനങ്ങള്‍ക്കും ദീര്‍ഘദൂര വാഹനങ്ങള്‍ക്കും നിയന്ത്രണം കൊണ്ടുവന്നിരിക്കുകയാണ്. കൊവിഡും ലോക്ഡൗണും മൂലം അല്ലെങ്കില്‍ തന്നെ മനുഷ്യന് ജീവിക്കാന്‍ പറ്റാത്ത അവസ്ഥയാണ്. ഇതിപ്പോള്‍ ഇരട്ടിചെലവ് കൂടിയാണ് പുതിയ ക്രമീകരണം വരുത്തിവെക്കുന്നത്.
നിര്‍മ്മാണ പ്രവര്‍ത്തനങ്ങള്‍ രണ്ടാംഘട്ടത്തില്‍ എത്തിയപ്പോള്‍ ഇത്രയും ബുദ്ധിമുട്ടുകള്‍ അനുഭവിക്കുന്നുണ്ടെങ്കില്‍ കൂടുതല്‍ പാലങ്ങള്‍ പൊളിക്കുന്നതോടെ കെഎസ്ആര്‍ടിസി ബസുകള്‍ അടക്കമുളളവയുടെ ഗതാഗതവും തടസപ്പെടും. ചെറുപാലങ്ങള്‍ പൊളിക്കുമ്പോള്‍ പാലത്തിന്റെ ഇരുവശവും ബസുകള്‍ എത്തുന്ന വിധത്തില്‍ സര്‍വീസുകള്‍ ക്രമീകരിക്കാനും യാത്രക്കാരെ ബസ് മാറ്റിക്കയറ്റി ലക്ഷ്യസ്ഥലത്ത് എത്തിക്കാനുമാണ് അധികൃതരുടെ നീക്കം. സര്‍ക്കാര്‍ ഉദ്യോഗസ്ഥര്‍, ചങ്ങനാശേരിയിലും കോട്ടയത്തും കച്ചവടം നടത്തുന്നവര്‍, മറ്റ് സ്വകാര്യ സ്ഥാപനങ്ങളില്‍ ജോലി ചെയ്യുന്നവര്‍ എന്നിങ്ങനെ ആയിരക്കണക്കിന് പേര്‍ ദിവസവും ഈ റൂട്ടിലെ കെഎസ്ആര്‍ടിസിയെ ആശ്രയിക്കുന്നുണ്ട്.
13 പാലങ്ങളുടെ പണിക്കായി എത്ര മാസങ്ങള്‍ എടുക്കും? നേരത്തെ പാലാരിവട്ടമോ, വൈറ്റില പാലമോ പറഞ്ഞതിനെക്കാള്‍ മുന്‍പ് നിര്‍മ്മിച്ച് നല്‍കിയത് പോലെ, ഈ എലിവേറ്റഡ് ഹൈവേയും നിര്‍മ്മിക്കാന്‍ സാധിക്കില്ലേ? അതാകുമ്പോള്‍ ജനങ്ങള്‍ക്കുളള ബുദ്ധിമുട്ടുകള്‍ കുറയുമല്ലോ എന്നും ഷീബ ചോദിക്കുന്നു. ആലപ്പുഴയില്‍ നിന്നും രാമങ്കരിയില്‍ റോഡ് വശത്ത് മീന്‍കച്ചവടം ചെയ്തിരുന്ന അജുവിന് പുതിയ നിര്‍മ്മാണങ്ങള്‍ തുടങ്ങിയതോടെ കച്ചവടവും കുറഞ്ഞെന്നാണ് പരാതി. എസി റോഡിലൂടെയുളള ദീര്‍ഘദൂര യാത്രക്കാരൊക്കെ തണലും പാടവുമൊക്കെ കാണുന്നേരം പത്ത് മിനിറ്റ് വാഹനം ഒതുക്കുകയും മീനും താറാവുമൊക്കെ വാങ്ങിക്കുകയും ചെയ്തിരുന്നു. ഇപ്പോഴാകട്ടെ ഈ ദീര്‍ഘദൂര യാത്രക്കാരെയും വലിയ വാഹനങ്ങളെയും വഴി തിരിച്ച് വിടുകയാണ്. ഇത്രയും നേരം ട്രാഫിക് ബ്ലോക്കില്‍ കുടുങ്ങിയ ശേഷം വണ്ടി ഓടിച്ച് ഇതിലെ വരുന്നവര്‍ പിന്നീട് മീന്‍ വാങ്ങാന്‍ കൂടി നിര്‍ത്താന്‍ മടി കാണിക്കുന്ന അവസ്ഥയാണ്. ഒരു രീതിയില്‍ ജീവിതം തിരികെ പിടിച്ച് വരുമ്പോഴാണ് മറ്റ് വഴികളിലൂടെ നമുക്കുളള പണികള്‍ വരുന്നതെന്നും നിരാശ കലര്‍ന്ന ചിരിയോടെ അജു പറഞ്ഞു.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!
