കല്യാണം എന്ന സിസ്റ്റം സ്ത്രീകള്‍ക്ക് ഒരു രീതിയിലും ഗുണം ചെയ്യുന്നില്ല; റിമ കല്ലിങ്കല്‍ പറയുന്നു
സ്വര്‍ണം രക്ഷിതാക്കള്‍ക്ക് ഭാരമാവും എന്ന ചിന്ത എനിക്ക് നേരത്തെ തന്നെ ഉണ്ടായിരുന്നു. ഉടലാകെ സ്വര്‍ണത്തില്‍ പൊതിഞ്ഞ കല്യാണത്തോടും വിയോജിപ്പായിരുന്നു.
മരണം കൊണ്ടല്ല, ജീവിതം കൊണ്ടാണ് നമ്മള്‍ മാറ്റങ്ങള്‍ ഉണ്ടാക്കേണ്ടതെന്ന് നടി റിമാ കല്ലിങ്കല്‍. കല്യാണം എന്ന സിസ്റ്റം സ്ത്രീകള്‍ക്ക് ഒരു രീതിയിലും ഒരു ഗുണവും ചെയ്യുന്നില്ല എന്നാണ് താന്‍ കരുതുന്നതെന്നും റിമ പറയുന്നു. ഗൃഹലക്ഷ്മിക്ക് നല്‍കിയ അഭിമുഖത്തിലാണ് റിമയുടെ വാക്കുകള്‍. ഒരാളെ ഞാന്‍ സ്‌നേഹിക്കുന്നുണ്ടെങ്കില്‍ അയാളുടെ കൂടെ ജീവിക്കണം എന്നുണ്ടെങ്കില്‍ ഒരു ലീഗല്‍ പേപ്പറിന്റെയും ആവശ്യം എനിക്ക് ഉണ്ടാവരുത് എന്നാണ് ഞാന്‍ വിശ്വസിക്കുന്നത്. കല്യാണം എന്ന സിസ്റ്റം സ്ത്രീകള്‍ക്ക് ഒരു രീതിയിലും ഗുണം ചെയ്യുന്നില്ല എന്ന് ഞാന്‍ കരുതുന്നു. ഒരു ബന്ധത്തില്‍ സ്‌നേഹവും കരുതലും പരസ്പര ബഹുമാനവും ഇല്ലാതാകുമ്പോള്‍, വേറെ വഴിയില്ലാതെ ഒരുമിച്ച് ജീവിക്കേണ്ടി വരുന്നതും ഈ സിസ്റ്റം കാരണമാണെന്നും റിമ പറയുന്നു. സ്ത്രീധനത്തോടും പീഡനങ്ങളോടും സ്ത്രീകള്‍ നോ പറയണമെന്ന ക്യാംപെയ്ന്‍ കൂടി ഉയര്‍ത്തിയാണ് റിമയുടെ വാക്കുകള്‍. ആഷിഖുമായുളള തന്റെ വിവാഹത്തെക്കുറിച്ചും റിമ വ്യക്തമാക്കുന്നുണ്ട്.
മതം എന്റെ ഒരു കണ്‍സേണ്‍ ആയിരുന്നില്ല. പിന്നെ സ്വര്‍ണം രക്ഷിതാക്കള്‍ക്ക് ഭാരമാവും എന്ന ചിന്ത എനിക്ക് നേരത്തെ തന്നെ ഉണ്ടായിരുന്നു. ഉടലാകെ സ്വര്‍ണത്തില്‍ പൊതിഞ്ഞ കല്യാണത്തോടും വിയോജിപ്പായിരുന്നു. നല്ല ഡിസൈനിലുളള ആഭരണങ്ങള്‍ ഇഷ്ടമാണ്. ഭംഗിക്ക് വേണ്ടി കല്യാണത്തിന് ആഭരണങ്ങള്‍ ഉപയോഗിക്കുന്നതിനോട് എതിര്‍പ്പുമില്ല. പക്ഷേ ഭാരം കൊണ്ട് നടക്കാന്‍ പറ്റാനാവാത്ത വിധം ആഭരണങ്ങള്‍ കുത്തി നിറക്കുന്നതാണ് നമ്മുടെ കല്യാണങ്ങള്‍.
സ്വയം തീരുമാനങ്ങള്‍ എടുക്കണം, സ്വന്തം കാലില്‍ നില്‍ക്കണം എന്ന് പെണ്‍കുട്ടികളോട് പറയാന്‍ എല്ലാവര്‍ക്കും എളുപ്പമാണ്. പെണ്‍കുട്ടികള്‍ എല്ലാം സഹിക്കണം എന്ന് പറഞ്ഞ് പഠിപ്പിക്കുന്ന ഈ സമൂഹത്തിലും സിസ്റ്റത്തിലും ജീവിക്കുന്ന അവര്‍ക്ക് അത് എത്ര ബുദ്ധിമുട്ടാണെന്ന് എനിക്കറിയാം. എങ്കിലും മാറ്റേണ്ടത് നമ്മുടെ രീതികള്‍ തന്നെയാണ്. നമ്മള്‍ തന്നെയാണ് മാറ്റത്തിന് തുടക്കമിടേണ്ടത്. മരണം കൊണ്ടല്ല, ജീവിതം കൊണ്ട് നമുക്ക് മാറ്റങ്ങള്‍ ഉണ്ടാക്കാം.
പെണ്‍കുട്ടികളുടെ വീട്ടുകാരോടും ചുറ്റുമുളള സമൂഹത്തോടും എനിക്ക് പറയാനുളളത്, നിങ്ങളുടെ സ്വത്ത്, സമ്പത്ത്, കുടുംബമഹിമ, അഭിമാനം എന്നിവയൊക്കെ ചുമക്കാനുളളവരല്ല പെണ്‍കുട്ടികള്‍. പെണ്‍കുട്ടി ജനിച്ച ദിവസം മുതല്‍ മരിക്കുന്നത് വരെ അവളെങ്ങനെ ജീവിക്കണം, എങ്ങനെ നടക്കണം, എന്ത് ധരിക്കണം, എന്ത് കഴിക്കണം, ആരെ കല്യാണം കഴിക്കണം, എപ്പോള്‍ കുട്ടികളുണ്ടാകണം, എപ്പോള്‍ ജോലിക്ക് പോകണം, ജോലി നിര്‍ത്തണം തുടങ്ങിയ എല്ലാ കാര്യങ്ങളും അടിച്ചേല്‍പ്പിക്കാതെ അവരെ വെറുതെ വിട്ടാല്‍ മാത്രം മതി. പെമ്പിളേളര് അടിപൊളിയാണ്, അവരെങ്ങനെയാണോ, അങ്ങനെത്തന്നെ അവര്‍ അടിപൊളിയാണ്. അവരെ അവരുടെ വഴിക്ക് വിടുക. ബാക്കി അവര്‍ നോക്കിക്കോളും.
ഇനിയാർക്ക് വേണം ലേണിംഗ് ആപ്പ്? ഇനി പഠിക്കാം ഈസിയായി! ഔട്ട്‍ക്ളാസിൽ!
